მსოფლიო

რუმინეთის პრეზიდენტი, კლაუს იოჰანისი თანამდებობიდან გადადგა

რუმინეთის მოქმედმა ცენტრისტმა პრეზიდენტმა, კლაუს იოჰანისმა გადადგომა გადაწყვიტა, რათა თავიდან აეცილებინა ოპოზიციური პარტიების მიერ პარლამენტში წამოწყებული იმპიჩმენტის პროცესი. ქვეყანა მწვავე დაპირისპირების ფონზე იმყოფება, ხოლო ულტრამემარჯვენე ძალები საპრეზიდენტო არჩევნების განმეორებამდე, რომელიც მაისშია დანიშნული, გავლენას იზრდიან.

"ეს მოთხოვნა ქვეყანაში და მის ფარგლებს გარეთ გარკვეულ შედეგებს გამოიწვევს. იმისათვის, რომ რუმინეთს ეს უაზრო და ნეგატიური კრიზისი ავარიდო, გადავდექი," - განაცხადა იოჰანისმა.

ევროკავშირის და ნატოს წევრი სახელმწიფო, რომელიც უკრაინას ესაზღვრება, შარშან ინსტიტუციურ ქაოსში აღმოჩნდა, როდესაც ნაკლებად ცნობილი ულტრამემარჯვენე, ნატოს კრიტიკოსი, კალინ გეორგესკუ საპრეზიდენტო არჩევნების პირველ ტურში გამარჯვებული გახდა.

მას შემდეგ, რაც მოსკოვმა უარყო ბრალდებები რუსეთის ჩარევაზე, რუმინეთის საკონსტიტუციო სასამართლომ ბათილად ცნო არჩევნები. მანვე დაადგინა, რომ იოჰანისი, რომლის მეორე და ბოლო ვადა 21 დეკემბერს ამოიწურა, პოსტზე დარჩებოდა ახალი საპრეზიდენტო არჩევნების ჩატარებამდე.

თუმცა, სამმა ულტრამემარჯვენე ოპოზიციურმა პარტიამ, რომელსაც პარლამენტში მანდატების დაახლოებით 35% უჭირავს, პრეზიდენტის იმპიჩმენტის ინიციატივა წამოაყენა. მათ ისარგებლეს საზოგადოების აღშფოთებით, რომელიც პროევროპულ, კორუფციულ სკანდალებში გახვეულ მმართველ ძალებს უკავშირდება.

რუმინეთის მთავრობის გადაწყვეტილებით, ხელახალი საპრეზიდენტო არჩევნების პირველი ტური 4 მაისს, ხოლო მეორე ტური 18 მაისს გაიმართება.

პრეზიდენტის მოვალეობას არჩევნებამდე პარლამენტის ზედა პალატის თავმჯდომარე, მმართველი კოალიციის წევრი, ლიბერალური პარტიის ლიდერი, ილიე ბოლოჟანი შეასრულებს, თუმცა შეზღუდული უფლებამოსილებით.

პრეზიდენტობის კანდიდატმა და მმართველი კოალიციის მხარდაჭერილმა კრინ ანტონესკუმ აღნიშნა, რომ იოჰანისის გადადგომა უკეთესი გამოსავალი იყო, ვიდრე იმპიჩმენტი, რაც საზოგადოებრივი დისკუსიის დღის წესრიგს შეცვლიდა.