მსოფლიო

რომის პაპმა ეპისკოპოსებს, პედოფილების მიმართ შეუწყნარებლობისკენ მოუწოდა

რომის პაპმა მსოფლიოს ეპისკოპოსებს მიმართა და იმ სასულიერო პირების მიმართ ნულოვანი ტოლერანტობისკენ მოუწოდა, ვინც ბავშვებზე სექსუალურ ძალადობას ახორციელებს.

ამის შესახებ პონტიფიკოსის მიერ ეპისკოპოსებისადმი გაგზავნილ წერილშია ნათქვამი.

ამასთან, რომის პაპი იმ „ცოდვის გამო, რომელიც ეკლესიას არცხვენს“ მიტევებას ითხოვს.

წერილში პონტიფოკოსი პირობას დებს, რომ ყველაფერს გააკეთებს, რათა“მსგავსი სიმხეცე აღარ იყოს“.

„მოდით, საჭირო ზომების მისაღებად გაბედულები ვიყოთ, რომ ჩვენი ბავშვების სიცოცხლე დავიცვათ“,-აღნიშნა რომის პაპმა.

მისივე თქმით, ეკლესია აღიარებს იმ სასულიერო პირების ცოდვებს, რომლებიც ბავშვებზე ძალადობენ.

ცნობისთვის, 2013 წელს პონტიფიკოსად არჩევისთანავე, რომის პაპმა ფრანცისკემ რიგი ნაბიჯები გადადგა, რომ ეკლესიაში ბავშვებზე სექსუალური ძალადობის ფაქტები აღმოეფხვრა. მან შესაბამისი მოწოდება, ჯერ კიდევ 2013 წელს გააკეთა.

იგი მაშინ აღიარებდა,რომ ამერიკის, ევროპისა და ავსტრალიის ეპარქიებში ბავშვებზე ძალადობის ფაქტებთან ბრძოლა, ეკლესიის ავტორიტეტისთვის მნიშვნელოვანია.

თუმცა, მაშინ უფლებადამცველი ორგანიზაციები ფრანსისკეს განცხადება სკეპტიკურად აღიქვეს, და იგი მისი წინამორბედის ბენედიქტე XVI-ს დაპირებებსაც შეადარეს, რომელიც ჯერ კიდევ 2005 წელს დებდა პირობას, რომ ეკლესიას „სექსუალური ძალადობის ჭუჭყისგან“ გაწმენდდა.

უფლებადამცველი ორგანიზაციები ბენედიქტეს სექსუალური ძალადობის ფაქტების დაფარვაში ადანაშაულებდნენ.

მონიკა დავლიანიძე