კომენტარი

რომ იყოს პირველი აპრილი, გულწრფელად გამიადვილდებოდა წერილზე განმარტების გაკეთება - მამუკა ბახტაძე

ნებისმიერი მინისტრი ჩემი კაბინეტიდან ყოველთვის მზად არის, გასცეს პასუხი ნებისმიერ კითხვებს, არ აქვს მნიშვნელობა, ეს იქნება საქართველოს პარლამენტში თუ საგამოძიებო ორგანოებთან, - განაცხადა საქართველოს პრემიერ-მინისტრმა, მამუკა ბახტაძემ „თიბისი ბანკის“ დამფუძნებლის, მამუკა ხაზარაძის მიერ სასამართლოში წარდგენილ წერილზე საუბრისას.

„მინდა, შევეხო ამ წერილს. დღეს არის 8 მარტი, რომ იყოს პირველი აპრილი, გულწრფელად გამიადვილდებოდა წერილზე განმარტების გაკეთება და შეიძლება ისიც მეთქვა, გიორგი გახარიამ ჩემთან დაადასტურა, რომ ნამდვილად ჩაწერა მათ შორის ის, რომ „არტარეასთან“ ერთად ითხოვდა რომელიმე მუსიკალური არხისგან ან „რაგბი ტვ“-სგან სარედაქციო პოლიტიკის შეცვლას.

ამ საკითხთან დაკავშირებით მიმდინარეობს მოკვლევა გიორგი გახარიამაც დაადასტურა და მეც, როგორც მთავრობის მეთაურმა მინდა, დავადასტურო, რომ ნებისმიერი მინისტრი ჩემი კაბინეტიდან ყოველთვის მზად არის, გასცეს პასუხი ნებისმიერ კითხვებს, არ აქვს მნიშვნელობა, ეს იქნება საქართველოს პარლამენტში თუ საგამოძიებო ორგანოებთან. რაც შეეხება იმას, რაც წავიკითხეთ ყველა მედიის მეშვეობით, ამ წერილის შინაარსი გამიჭირდება სერიოზული კომენტარი“, – განაცხადა მამუკა ბახტაძემ.