კომენტარი

როგორ შეიძლება ვინმესთვის სარწმუნო იყოს, რომ ერთმა ადამიანმა მეორეს დაზღვეული ფოსტა ზეწოლის მიზნით გაუგზავნა-სერგი კაპანაძე

„მოძრაობა თავისუფლებისთვის-ევროპული საქართველოს“ წევრის, სერგი კაპანაძის განცხადებით, როგორ შეიძლება ვინმესთვის სარწმუნო იყოს ვერსია, რომ ერთმა ადამიანმა მეორეს დაზღვეული ფოსტა გაუგზავნა ზეწოლის მიზნით.

ამის შესახებ კაპანაძემ პროკურატურის მიერ უზენაესი სასამართლოს მოსამართლეების საქმეზე გაკეთებული განცხადების კომენტირებისას განაცხადა.

„მე არ მესმის, როგორ შეიძლება ვინმესთვის იყოს სარწმუნო ვერსია, რომ ზეწოლის მიზნით, ერთმა ადამიანმა მეორეს დაზღვეული ფოსტა გაუგზავნა და მერე მიწერა მესიჯი და უთხრა, ხომ მიიღეო ფოსტაო. იმდენად აბსურდია და იმდენად არასერიოზულია ეს ამბავი, რომ უბრალოდ ვერ წარმომიდგენია, რომ ეს მართლა ვინმემ აღიქვას სერიოზულად. კიდევ ერთი რამე არის საინტერესო თვითონ იმ განცხადებაში, რომელიც მოსამართლეებმა დაწერეს და შემდეგ პროკურატურას მიმართეს. თვითონ წერენ, რომ ეს გავს პროვოკაციას მათ წინააღმდეგ და იქ არ არის დადასტურებულ ფაქტად, რომ ისინი მართლაც ზეწოლას განიცდიდნენ კონკრეტული ადამიანებისგან“,-განაცხადა სერგი კაპანაძემ.

მთავარმა პროკურატურამ , საზოგადოების მაღალი ინტერესიდან გამომდინარე დაასახელა ის პირი, რომელიც უზენაესი სასამართლოს მოსამართლეებზე ბესარიონ ალავიძესა და პაატა ქათამაძეზე შესაძლო ზეწოლას ახდენდა.

როგორც უწყების მიერ გაკეთებულ განცხადებაშია ნათქვამი, 11 იანვარს, უზენაესი სასამართლოს მოსამართლეებმა საცხოვრებელი სახლის მისამართებზე დ. საყვარელიძის სახელით მიიღეს წერილობითი მიმართვები, რომლითაც მიმართვების ავტორი მოსამართლეებს სთავაზობს გარკვეული ქმედებების განხორციელებას და ამ ქმედებების სანაცვლოდ არამართლზომიერ სარგებელს. ამავდროულად ხსენებულმა მოსამართლეებმა მათ სარგებლობაში არსებულ მობილურ ტელეფონებზე უცხოური მობილური ტელეფონის ნომრიდან მიიღეს მსგავსი ხასიათის მოკლე ტექსტური შეტყობინებები.

მონიკა დავლიანიძე