კომენტარი

როგორ აზროვნებთ? რომელი ორგანოთი აზროვნებთ? - ირმა ინაშვილი საქართველოს საგარეო საქმეთა სამინისტროს

შვეიცარიის საელჩოში არსებობს რუსეთის სექტორი და ამ სექტორში ზის ერთი ვასია, რიგითი თანამშრომელი და ამ რიგით თანამშრომელს ვუშვებთ ქვეყნიდან. სამაგიეროდ, ვუცხადებთ სოლიდარობას დიდი ბრიტანეთის და რუსეთის ორმაგ ჯაშუშს, ვინმე სკრიპალს, რომელიც არავითარი სასიკეთო ფიგურა საქართველოსთვის არ არის, - განაცხადა პარლამენტის ვიცესპიკერმა ირმა ინაშვილმა ტელეკომპანია ,,იბერიას“ გადაცემაში ,,თავისუფალი სივრცე.“

მისი შეფასებით, იმ ვითარებაში, როდესაც რუსეთი საკუთარ სამხედრო შენაერთებს აძლიერებს, ქართული მხარემ ყოვლად ანტისახელმწიფოებრივი გადაწყვეტილება მიიღო.

"უნდა გავაცნობიეროთ, რომ ჩვენი ქვეყანა დღეს დგას ახალი ომის საფრთხის წინაშე და ჩვენ ვაკეთებთ იმას, რომ ვავრცელებთ ბოკერიას რეზოლუციებს. ამ რეზოლუციას მოყვა ეს პასუხები რუსეთის მხრიდან, რომ ის გააგრძელებს სამხედრო შენაერთების გაძლიერებას საქართველოს მახლობლად, რომ შეიყვანს 20 ათას სამხედროს, გააძლიერებს ტექნიკას. იყო ინფორმაცია, რომ იქ აშენდება ახალი სამხედრო ქალაქები. რუსეთი არ მალავს იმას, რომ მისთვის არის სერიოზული საფრთხე ნატოს საკითხი და ის ელოდება და არ გამორიცხავს იმას, რომ საქართველოს მხრიდან მოხდება მასზე თავდასხმა. შესაბამისად, გვეუბნება და არ მალავს, რომ ის იძლიერებს საკუთარ უსაფრთხოებას. ამ ვითარებაში ჩვენ ვაკეთებთ იმას, რომ ყოვლად ანტისახელმწიფოებრივ გადაწყვეტილებას ვიღებთ. როდესაც დიპლომატიური ურთიერთობა არ გვაქვს რუსეთთან , დიპლომატები აქ არ მუშაობენ, შვეიცარიის საელჩოში არსებობს რუსეთის სექტორი და ამ სექტორში ზის ერთი ვასია, რიგითი თანამშრომელი და ამ რიგით თანამშრომელს ვუშვებთ ქვეყნიდან. სამაგიეროდ, ვუცხადებთ სოლიდარობას დიდი ბრიტანეთის და რუსეთის ორმაგ ჯაშუშს, ვინმე სკრიპალს, რომელიც არავითარი სასიკეთო ფიგურა საქართველოსთვის არ არის.

საქართველო ტატუნაშვილის მკვლელობის გამო კი არ უცხადებს პროტესტს დიპლომატებს და რუსეთის სექტორის თანამშრომლებს, ამას კიდევ გავიგებდით ჩვენ, რომ ტატუნაშვილის და საქართველოს მოქალაქეების გატაცების გამო რომ ეთქვა ქართულ მხარეს, აი, დატოვოს საქართველო რუსეთის სექტორის თანამშრომლმაო. სკრიპალს უცხადებენ, გესმით, სოლიდარობას და დიდ ბრიტანეთს უცხადებენ სოლიდარობას.

ვის ეტენებით, სად ეტენებით?! მე მივმართავ საქართველოს საგარეო საქმეთა სამინისტროს: სად არის თქვენი აზროვნება? როგორ აზროვნებთ? რომელი ორგანოთი აზროვნებთ? ვის სასარგებლოდ აზროვნებთ? და როდესმე უნდა დამთავრდეს საქართველოში ბოკერიას დირექტივებით ცხოვრება და საქმიანობა? ბოკერიას დღის წესრიგით მუშაობს დღეს საქართველოს საგარეო საქმეთა სამინისტრო, მუშაობს საქართველოს პარლამენტი", - განაცხადა ირმა ინაშვილმა.