კომენტარი

როდესაც მექნება თეთრი თმა, გავიზრდი თმას და გავიკეთებ დიდ „კოსას“, შეიძლება, ამ თემაზე ვისაუბრო - თეა წულუკიანი

„როდესაც მექნება თეთრი თმა, გავიზრდი თმას და გავიკეთებ დიდ „კოსას“, თქვენ, რა თქმა უნდა, მაშინ ისევ ახალგაზრდები იქნებით, შეიძლება, ამ თემაზე ვისაუბრო, მაგრამ კიდევ ერთხელ ვამბობ, არ ვთვლი საჭიროდ ამ თემაზე საუბარს, ანუ თემის დაკონკრეტებას”, - განაცხადა იუსტიციის მინისტრმა თეა წულუკიანმა იმ კითხვის საპასუხოდ, რომელიც მასსა და გუნდის დანარჩენ წევრებს შორის არსებულ უთანხმოებას ეხებოდა.

წულუკიანი ამბობს, რომ ჯერჯერობით გადადგომას არ აპირებს, თუმცა მისი პოსტზე და გუნდში დარჩენა დამოკიდებულია გადაწყვეტილებაზე, რომელსაც პრემიერი მიიღებს.

"მეშვიდე წელია დაიწყო, რაც მე ჩემს კოლეგა დავით სერგეენკოსთან ერთად ამ პოზიციაზე ვაგრძელებ მუშაობას და მართალი ბრძანდებით, რომ კვარტალი ერთია და რამდენჯერმე ისმის მინიშნება იმაზე, რომ შეიძლება გადააყენონ, გაუშვან ან წავიდეს. ახლა არის პირველი შემთხვევა, როდესაც ეს შეეფერება სიმართლეს, როდესაც მე გამიჩნდა თავად სურვილი, რომ თუ ეს საჭიროა, ადგილი დავუთმო სხვას. ამ თემაზე არ ვისაუბრებდი, ეს ამბავი გარეთ რომ არ გამოსულიყო. რაკი თქვენამდე მოვიდა, მედია გამოხატავს ინტერესს და როცა ეს სიმართლეა, თავს ვალდებულად ვთვლიდი, რომ გულწრფელად მეპასუხა. დანარჩენი წინა სპეკულაციები თუ მოთხოვნები იყო რეალობისგან შორს. ამიტომ ჩემი მხრიდან კომენტარის ღირსად არ ჩამითვლია საჭიროდ,"- განაცხადა თეა წულუკიანმა.