კომენტარი

როდესაც ამერიკის ელჩი ბრალს სდებს საქართველოს მთავრობას, ესაა საქართველოს საშინაო საქმეებში უხეში ჩარევა - სოსო მანჯავიძე

თბილისის საკრებულოს წარმომადგენელი, სოსო მანჯავიძე რუსთავი-2-თან დაკავშირებით ამერიკის ელჩის მიერ გაკეთებულ განცხადებას არაკომპეტენტურს უწოდებს და ადმინისტრაციას ელჩის გაწვევას ურჩევს.

„იმედი მაქვს, ადმინისტრაცია მალე გაიწვევს ელჩს. ის ქედმაღლური და არაკომპეტენტური განცხადება, რაც ელჩმა გააკეთა, ქვეყნის საშინაო საქმეებში უხეში ჩარევაა. მართალია, ამას მიჩვეულები ვართ, მაგრამ ასე არ უნდა ხდებოდეს.

ეს იყო აბსოლუტურად გაუგებარი განცხადება. გამოდის ელჩი ამერიკის შეერთებული შტატების სახელით და ადანაშაულებს საქართველოს ხელისუფლებას. ეს იყო საქმეში ჩაუხედავი განცხადებები. იმ პოლიტიკურ კონტექსტში, რაც დღესაა ამერიკაში, როცა ტრამპმა პირდაპირ ბოიკოტი გამოუცხადა რუსთავი-2-ის იდეოლოგიურ დედას (cnn-ს), ეს არის პირდაპირ კონტექსტიდან ამოვარდნილი განცხადება. რაც მალე შეიცვლება ტელეკომპანიაში ის პოლიტიკა, რომელიც ორიენტირებულია სახელმწიფო სამსახურების დაშინებაზე და პანიკის დათესვაზე, მით უკეთესი იქნება ქვეყნისთვის“, -განაცხადა სოსო მანჯავიძემ დღეს გამართულ პრესკონფერენციაზე.

ცნობისათვის: ამერიკის შეერთებული შტატების საელჩომ უზენაესი სასამართლოს მიერ რუსთავი 2-ის საქმეზე მიღებულ გადაწყვეტილებასთან დაკავშირებით განცხადება გუშინ გაავრცელა.

"ამერიკის შეერთებული შტატები შეშფოთებით უყურებს უზენაესი სასამართლოს მიერ რუსთავი 2-ის შესახებ მიღებული გადაწყვეტილების შედეგს, რამაც შესაძლოა ფაქტობრივად შეზღუდოს სამაუწყებლო მედიისადმი ოპოზიციური ხმის წვდომა.

პლურალისტური მედია უმნიშვენოვანესია საქართველოს დემოკრატიული ზრდისა და ევრო-ატლანტიკური მისწრაფებებისთვის. ჩვენ მოვუწოდებთ მთავრობას, მიიღოს ზომები, რათა უზრუნველყოს, რომ მედია გარემო დარჩეს თავისუფალი, ღია და პლურალისტური." - ნათქვამია აშშ-ს საელჩოს განცხადებაში.

ნინო ექვთიმიშვილი