კომენტარი

რიგგარეშე საპრეზიდენტო არჩევნები ქვეყანაში საკონსტიტუციო კოლიზიას გამოიწვევს - გიორგი მარგველაშვილი

საქართველოს პრეზიდენტი გიორგი მარგველაშვილი ტელეკომპანია „იბერიასთვის“ მიცემულ ინტერვიუში საკონსტიტუციო კომისიის იმ კანონპროექტზე ისაუბრა, რომელიც პრეზიდენტის უფლებამოსილების შეზღუდვასა და პირველი პირის არჩევის წესს ეხება.

გიორგი მარგველაშვილის თქმით, რიგგარეშე საპრეზიდენტო არჩევნების ჩატარების შემთხვევაში, ეს ქვეყანაში საკონსტიტუციო „კოლიზიას“ გამოიწვევს.

„ თეორიულად, იმ შემთხვევაშიც კი, თუ რომელიმე პოლიტიკოსი ამ ნაბიჯს გადადგამს, ეს სცენარი, როგორც ეს საზოგადოებისთვის იყო მიწოდებული, ასეთი მარტივი არ არის ბევრი ვითარებიდან გამომდინარე. თუკი ჩვენ დავინახავთ, რომ კონსტიტუცია გადადის ერთი ფორმიდან მეორეში, იქ, ბუნებრივია, გარკვეული უფლებამოსილებების თემებიც იქნება, რომლებიც იცვლება. ამ პროცესში ხელოვნურად საპრეზიდენტო არჩევნების დანიშვნა, ბუნებრივია, მისი ჩატარების შემდეგაც, ქმნის კონსტიტუციურ კოლიზიას, იმიტომ რომ ერთი კონსტიტუციით მოხდება არჩევა, ხოლო მეორე კონსტიტუციის თანახმად შევა პრეზიდენტი ძალაუფლებაში. ეს კოლიზია იქნება. საერთოდ რიგგარეშე არჩევნები არის ქვეყნის ნორმალური საარჩევნო დინამიკიდან გადახვევა, სტაბილურობისა და დაცულობის თვალსაზრისითაც“, - განცხადა პრეზიდენტმა.

პრეზიდენტის თქმით, ის გადადგომას არ აპირებს.

„ჩემი აზრით, პრეზიდენტის ინსტიტუტი სჭირდება საზოგადოებას , მისი არჩევითობა სჭირდება საზოგადოებასა და პოლიტიკურ სისტემას, ამაზე ღიად უნდა ვილაპარაკოთ და არ დავაყენოთ ახალი პოლიტიკური ვითარება ე.წ. „სათადარიგო შესავლელიდან“. ეს არასდროს არ ყოფილა ჩემი სტილი, შესაბამისად, არგუმენტები, რომ ასეთი ნაბიჯი გადაიდგას ჯერ ერთი, აპრიორი, არასწორია დღეს ამაზე საუბარი, იმიტომ რომ ის ბრძოლა, რომელსაც ჰქვია პრეზიდენტის ინსტიტუტის კონსტიტუციურობის დაცვა და შენარჩუნება ამ სახელმწიფოსთვის, ეს დებატები და საუბრები ჯერ კიდევ არ დამთავრებულა. თავიდანვე კაპიტულანტურად იმაზე ლაპარაკი, მერე რას ვიზამდი, დღეს არასწორია, მაგრამ პიროვნულადაც არ ვარ მიდრეკილი ასეთი ნაბიჯის გადასადგმელად“, - თქვა მარგველაშვილა ტელეკომპანია “იბერიასთან“ საუბრისას.

ტელეკომპანია „იბერიასთან“ პრეზიდენტმა ასევე ისაუბრა „გაზპრომზე“, გია ცერცვაძის საქმეზე , „რუსთავი 2-ზე“, ქვეყანაში არსებულ ეკონომიკურ მდგომარეობასა და ვიზალიბერალიზაციაზე.

ანა მებურიშვილი