კომენტარი

რეფორმები ისეთი ნელი ტემპებით არ უნდა სრულდებოდეს, როგორითაც დღეს მიდის - სერგი კაპანაძე

„ევროპული საქართველოს“ წევრის, სერგი კაპანაძის შეფასებით, ის რეფორმები, რომელთა განხორციელების ვალდებულება აქვს აღებული ქვეყენას ასოცირების ხელშეკრულებით, ისეთი ნელი ტემპებით არ უნდა სრულდებოდეს, როგორითაც ის დღეს მიდის.

ამის შესახებ კაპანაძემ მედიას „აღმოსავლეთ პარტნიორობის“ 24 ნოემბრის სამიტის განხილვის ფარგლებში განუცხადა, რომელსაც მესამე სექტორისა და საგარეო საქმეთა სამინისტროს წარმომადგენლები, მათ შორის მინისტრი მიხეილ ჯანელიძე ესწრება.

„ის რეფორმები, რომლის ვალდებულება ჩვენ ავიღეთ ასოცირებით და ღრმა და ყოვლის შემცვლელი თავისუფალი ვაჭრობის შეთანხმებით, უნდა იყოს შესრულებული, მათ შორის წინმსწრებად შესრულებული და არა ისეთი ნელი ტემპებით, როგორითაც დღეს მიდის.

ასევე სხვა ტიპის კითხვები არ უნდა ჩნდებოდეს. მათ შორის ისეთი კითხვები, როგორიც არის: რატომ უქმდება სახელმწიფო მინისტრის აპარატი, რომელიც ახორციელებდა მეტ-ნაკლებად ეფექტურ კოორდინირებას.

ასევე, რატომ არიან საქართველოში, მათ შორის სტრასბურგის ბოლო გადაწყვეტილების თანახმად, პოლიტიკური პატიმრები.

ასეთი ტიპის კითხვები აღარ უნდა არსებობდეს. გააქტიურებული უნდა იყოს ძალისხმევა, რომ ევროპაში ის სკეპტიკური ქვეყნები, რომლებიც ჩვენი წინააღმდეგი არიან, გადავარწმუნოთ“,-განმარტა კაპანაძემ.

მონიკა დავლიანიძე