მსოფლიო

რეჯიფ ტაიფ ერდოღანი რუსული საზენიტო სარაკეტო სისტემის შესყიდვასა და მოსკოვთან ერთობლივ წარმოებაში პრობლემას ვერ ხედავს

თურქეთის პრეზიდენტი რეჯიფ ტაიფ ერდოღანი რუსული საზენიტო სარაკეტო სისტემა С-400-ის შეძენაში პრობლემას ვერ ხედავს. თურქეთის პირველმა პირმა Haberturk-თან საუბრისას არ გამორიცხა, რუსეთთან ერთობლივი სარაკეტო სისტემის წარმოება დაიწყოს.

ერდოღანმა ასევე იმედი გამოთქვა, რომ რუსეთის პრეზიდენტ ვლადიმერ პუტინთან მოლაპარაკებებს დაიწყებს С-500-ზეც.

ასე გამოეხმაურა თურქეთის პრეზიდენტი ნატოში აშშ-ის მუდმივი წარმომადგენლის კეი ბეილი ხათჩინსონის განცხადებას. ხათჩინსონმა თქვა, რომ ანკარის გადაწყვეტილება, შეისყიდოს С-400, არის პრობლემა, რომელიც ალიანსს აწუხებს. ნატოში აშშ-ის წარმომადგენელმა აღნიშნა, რომ ვაშინგტონს ანკარასთან თანამშრომლობა სურს.

შეთანხმება რუსეთსა და თურქეთს შორის სექტემბრის შუა რიხცვებში შედგა. კონტრაქტის თანახმად, საზენიტო-სარაკეტო სისტემა С-400-ის ოთხი დივიზიონის შესყიდვა ანკარას 2 მილიარდ დოლარზე მეტი დაუჯდება.