კომენტარი

რაც გუშინ ითქვა, არის ძალიან სერიოზული ბრალდება, რომელსაც აუცილებლად სჭირდება დამტკიცება ან გამორიცხვა - დავით სერგეენკო

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი დავით სერგეენკო „თიბისი ბანკის“ დამფუძნებლის, მამუკა ხაზარაძის მიერ გუშინ გაკეთებულ განცხადებას ეხმაურება.

მინისტრის თქმით, საკითხი თავისი მასშტაბით და საზოგადოებრივი ინტერესიდან გამომდინარე აუცილებლად მოითხოვს გამჭირვალე და შედარებით მოკლე ვადებში განხილვას, რომ არცერთი კითხვა არ დარჩეს პასუხგაუცემელი.

„ის, რაც გუშინ ითქვა, არის ძალიან სერიოზული ბრალდება, რომელსაც, როგორც ნებისმიერ ბრალდებას, აუცილებლად სჭირდება დამტკიცება ან გამორიცხვა. დასკვნების წინასწარ გენერირება სწორი არ მგონია. რაც შეეხება გიორგი გახარიას, მას წლებია, ვიცნობ, სამსახურებრივადაც, მეგობრულადაც და პრაქტიკულად, გამოვრიცხავ, რომ მას ეს გაეკეთებინა. მარტო პროკურატურის ან პროკურორის ნებაზე არ არის დამოკიდებული ასეთი საქმის გამოძიება. ეს კომპლექსური პროცესია, მასში სხვადასხვა უწყება მონაწილეობს და ნამდვილად მჯერა, რომ გამოძიება იქნება ობიექტური და გამჭვირვალე“, – განაცხადა დავით სერგეენკომ.

შეგახსენებთ, „თიბისი ბანკის“ დამფუძნებელმა მამუკა ხაზარაძემ პარლამენტის საფინანსო-საბიუჯეტო კომიტეტის სხდომაზე განაცხადა, რომ საპრეზიდენტო არჩევნების მეორე ტურის წინ შინაგან საქმეთა მინისტრ გიორგი გახარიასგან მიიღო მუქარის წერილი, სადაც მათი რეპუტაციის დანგრევაზე იყო საუბარი.

მამუკა ხაზარაძის განცხადებაზე კომენტარი გუშინ შს მინისტრმა, გიორგი გახარიამ გააკეთა. გახარიას თქმით, ის წერილებს არ წერს და სათქმელს ყველას პირდაპირ ეუბნება.