მსოფლიო

რად გვინდა სააკაშვილისნაირი ჯამბაზები? - ვლადიმერ პუტინი

რუსეთის პრეზიდენტმა ვლადიმერ პუტინმა რუსი ოპოზიციონერი ალექსეი ნავალნი მიხეილ სააკაშვილს შეადარა. ამის შესახებ პუტინმა ავსტრიული ტელერადიოკომპანია ORF-სთვის მიცემულ ინტერვიუში განაცხადა.

„არ გვსურს, კიდევ ერთი, მეორე, მესამე ან მეხუთე სააკაშვილი, საქართველოს ექს-პრეზიდენტი, შემოგვტენონ. არ გვსურს, რომ ჩვენს პოლიტიკურ სცენაზე გამოჩნდეს მეორე, მესამე, მეოთხე გამოცემის გამოცემის სააკაშვილი. თქვენ მოგწონთ ასეთი ფიგურანტები, ვითომ პოლიტიკური მოღვაწეები?

ჩვენ, რუსეთს, სჭირდება ხალხი დადებითი დღის წესრიგით, რომლებმაც იციან და არა მხოლოდ აღნიშნავენ პრობლემებს, რომლებიც საკმარისი გვაქვს, როგორც თქვენთან ავსტრიაში, ისევე, როგორც ნებისმიერ სხვა ქვეყანაში“, -აღნიშნა პუტინმა ჟურნალისტ არმინ ვოლფთან და განაცხადა, რომ თუ პოლიტიკოსი მხოლოდ პრობლემაზე საუბრობს და არა გადაჭრის გზებზე, ის ხალხისთვის უინტერესო ხდება.

ჟურნალისტის შეკითხვაზე, რომ ამომრჩეველს არ მიეცა საშუალება, ნავალნისთვის ხმა მიეცა, რადგან მან ვერ შეძლო თავისი კანდიდატურის დაყენება, პუტინმა განაცხადა, რომ „ამომრჩევლებს შეუძლიათ, ნებისმიერ ადამიანს უყურონ, რადგან ჩვენთან ინტერნეტი თავისუფალია, არავის არ დაუხურავს. მასობრივი ინფორმაციის საშუალებები თავისუფალია. ხალხს ყოველთვის შეუძლია გამოსვლა და განცხადებების გაკეთება საკუთარ თავზე, რასაც აკეთებს სხვადასხვა პოლიტიკური მოძრაობისა და მიმართულების სხვადასხვა ფიგურანტი. თუკი ადამიანი ამომრჩევლის წინაშე რაღაც წონას იძენს, მაშინ ის იქცევა ფიგურად, რომელთანაც უნდა აწარმოოს დიალოგი სახელმწიფო ხელისუფლებამ. თუკი ამა თუ იმ პოლიტიკური ძალის ნდობის ხარისხი 1,2,3%-ს შეადგენს ან პროცენტის ერთ მეასედებს, მაშინ რაზე ვსაუბრობთ? მაშინ, ინებეთ, სააკაშვილი. რად გვინდა ასეთი ჯამბაზები?“.

პუტინს არცერთხელ არ უხსენებია უშუალოდ ნავალნი.