კომენტარი

ქვეყანაში მედიკამენტების ხარიხსი არასაკმარისად კონტროლდება - აკაკი ზოიძე

პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარის, აკაკი ზოიძის განცხადებით, ქვეყანაში მედიკამენტების ხარიხსი არასაკმარისად კონტროლდება.

როგორც ზოიძემ გადაცემა „360 გრადუსში“ აღნიშნა, ფარმაცევტული ბაზრის შემოწმებისთვის რეგულირების სააგენტოს წელიწადში 170 ათასი ლარი აქვს გამოყოფილი, რაც მისი თქმით, არსაკმარისი თანხაა.

„მოკლედ გიპასუხებთ – არასაკმარისად კონტროლდება. ჩვენ გვაქვს პარალელურად იმპორტისა და აღიარებითი რეგისტრაციის მექანიზმები ჩართული. მაგალითად, თუ ევროგაერთიანებაში არის პრეპარატი დარეგისტრირებული, ეს ნიშნავს, რომ ის ხარიხიანია თუ იქ ცირკულირებს, ამიტომაც, ჩვენ პირდაპირ ვაღიარებთ, რომ არ დავხარჯოთ თანხები, რადგან ამას უზარმაზარი რესურსი ჭირდება, რომ თითოეული პრეპარატის ხარისხი ამოწმო. აქ მარტო ხარისხი არ არის- აქ არის ბიოაქტიურობის საკითხი და ბევრი რამ სხვა, ანუ რამდენად ადეკვატური რაოდენობაა ნივთიერების პრეპარატის შიგნით. ეს ყველაფერი საკმაოდ ძვირი ჯდება. ჩვენ კონტროლს ვაწარმოებთ, როდესაც მედიკამენტის შემოტანა ან აღიარება ხდება, მაგრამ შემდეგ როგორი მედიკამენტი ცირკულირებს ქსელში, პირველი ნიმუშების შემოტანის შემდეგ, ამის მხოლოდ ლიმიტირებული კონტროლი ხდება.

წელიწადში 170 ათას ლარად, რომელიც აქვს რეგულირების სააგენტოს ამ პროგრამაზე, ძალიან ცოტა რამის გაკეთება შეიძლება. ეს თანხა ცოტაა. წლებია ჩვენ კიდევ ლაბორატორიის პრობლემაც გვქონდა. უცხოურ ლაბორატორიებს კი ასე მცირე ტენდერებში მონაწილეობა არ უღირთ, როდესაც სამინისტრო ტენდერს აცხადებს. რამდენადაც ვიცი, სამინისტრო მუშაობდა ამ თემაზე და მათ ვკითხოთ, დაასრულეს თუ არა მუშაობა ლაბორატორიაზე“,-აღნიშნა ზოიძემ.

მონიკა დავლიანიძე