მსოფლიო

ქერჩის სრუტეში მომხდარის გამო დონალდ ტრამპმა ვლადიმერ პუტინთან შეხვედრა გააუქმა

აშშ-ის პრეზიდენტმა დონალდ ტრამპმა ქერჩის სრუტეში რუსული სპეცსამსახურების მიერ უკრაინული გემების დაკავების გამო რუს კოლეგასთან, ვლადიმერ პუტინთან დაგეგმილი შეხვედრა გააუქმა. ამის შესახებ ტრამპმა ტვიტერზე დაწერა.

„იმ ფაქტის გათვალისწინებით, რომ უკრაინას რუსეთმა არ დაუბრუნა გემები და მეზღვაურები, გადავწყვიტე, რომ ყველა დაინტერესებული მხარისთვის უკეთესი იქნება, თუკი არგენტინაში ვლადიმერ პუტინთან დაგეგმილ შეხვედრას გავაუქმებ. მოუთმენლად ველოდები ამ შეხვედრას, როგორც კი სიტუაცია გამოსწორდება!“, - დაწერა ტრამპმა ტვიტერზე.

„დიდი ოცეულის“ სამიტი არგენტინის დედაქალაქ ბუენოს აირესში 30 ნოემბრიდან 1-ელ დეკემბრამდე გაგრძელდება.

ცნობისთვის, 25 ნოემბერს რუსეთის სამხედრო საზღვაო ფლოტის ხომალდებმა უკრაინის კატარღებს ოდესის პორტიდან მარიუპოლის პორტში გადაადგილების დროს ცეცხლი გაუხსნეს. ინციდენტის შედეგად, უკრაინის ექვსი მოქალაქეა დაშავებული. რუსმა მესაზღვრეებმა 24 უკრაინელი სამხედრო დააკავეს. უკრაინამ რუსეთის მოქმედებები აგრესიად შეაფასა. ქვეყნის 10 ოლქში საომარი მდგომარეობა გამოცხადდა.