მსოფლიო

ქერჩის კოლეჯში თავდასხმის შედეგად დაღუპულთა რიცხვი 20-მდე გაიზარდა

რუსეთის მიერ ანექსირებულ ყირიმში, ქალაქ ქერჩის პოლიტექნიკურ კოლეჯში მომხდარი აფეთქებისა და სროლის შედეგად დაღუპულთა რიცხვი 20-მდე გაიზარდა - აქედან 15 სტუდენტია, მათ შორის 11 არასრულწლოვანი. დანარჩენი 5 დაღუპული სასწავლო დაწესებულების თანამშრომელი აღმოჩნდა. ამის შესახებ რუსეთის ჯანდაცვის მინისტრმა ვერონიკა სკვორცოვამ განაცხადა.

ყირიმის ე.წ. მთავრობამ გარდაცვლილთა სია გამოაქვეყნა, რომელშიც მხოლოდ 19 გვარია მითითებული. მასში არ შეუყვანიათ თავდასხმელი.

რუსეთის ჯანდაცვის მინისტრის განმარტებით, უმეტესობა დაიღუპა ცეცხლსასროლი იარაღიდან მიყენებული ჭრილობის გამო, ხოლო დაშავებულებს აღებიშნებათ აფეთქების შედეგად მიღებული დაზიანებები.

გუშინ ქერჩის პოლიტექნიკური კოლეჯის 18 წლის სტუდენტმა ვლადისლავ როსლიაკოვმა სასწავლებელში ასაფეთქებელი მოწყობილობა აამოქმედა და სროლა ატეხა, რის შემდეგ თავი მოიკლა.

მომხდარზე გამოძიება „ტერაქტის“ მუხლით დაიწყო, თუმცა მოგვიანებით ის გადაკვალიფიცირეს სხვა მუხლით, რომელიც გულისხმობს საყოველთაოდ საშიში საშუალებით 2 ან მეტი ადამიანის მკვლელობას.

რუსულმა მედიამ როსლიაკოვის ნაცნობებზე დაყრდნობით იუწყებოდა, რომ 18 წლის სტუდენტი „ვერ იტანდა კოლეჯს ბოროტი მასწავლებლების გამო“ და მიანიშნებდა, რომ აპირებდა, შური ეძია მათზე.

მომხდარის გამო ყირიმში სამდღიანი გლოვაა გამოცხადებული.