კომენტარი

`ქართული ოცნება` თვითონ აჩქარებს თავისი პოლიტიკური სამარის გათხრას - ბადრი ჯაფარიძე

"ქართული ოცნება" თვითონ აჩქარებს თავისი პოლიტიკური სამარის გათხრას, - ასე ეხმაურება „ლელო - ძლიერი საქართველოს“ პოლიტსაბჭოს თავმჯდომარე, ბადრი ჯაფარიძე პროკურატურის მიერ, საბოტაჟის, მტრულ საქმიანობაში დახმარების და ხელისუფლების დამხობის მოწოდების საქმეზე, ოპოზიციონერი პოლიტიკოსების წინააღმდეგ სისხლის სამართლებრივი დევნის დაწყებას.

„რამდენიმე დღის წინ, 1990 წელს ჩატარებული დემოკრატიული არჩევნების 35 წლისთავი ავღნიშნეთ. ამ 35 წლის განმავლობაში, ჩემი ამოცანა ყოველთვის იყო, წინააღმდეგობა გაგვეწია სახელმწიფოს მიმართ განხორციელებული საბოტაჟის მიმართ, წინააღმდეგობა გაგვეწია დემოკრატიულად არჩეული ხელისუფლების ძალადობრივი დამხობის მიმართ, რომელსაც ადგილი ჰქონდა 92 წელს და მე მაშინ ვიყავი პარლამენტის შენობაში და გარედან გვბომბავდნენ, ტყვიებს გვესროდნენ, მაგრამ ჩვენ ვიცავდით დემოკრატიულად არჩეულ ხელისუფლებას. შემდგომშიც ჩემი და ჩემი თანამებრძოლების გზა ყოველთვის მიმართული იყო იმისკენ, რომ სახელმიფო დაცული ყოფილიყო საბოტაჟისგან. დღევანდელი ხელისუფლება, რომელიც ჩვენი ქვეყნის, ჩვენი სახელმწიფოს მიმართ, მისი ევროპული მომავლის პირდაპირ საბოტაჟს ახორციელებს, ეს ხელისუფლება გვიყენებს ბრალს საბოტაჟის ბრალდებით.

რა თქმა უნდა ეს არის, პროკურატურის მიერ პოლიტიკური დავალების შესრულება, მიზანი კი პოლიტიკოსების, პოლიტიკის განადგურებაა, მაგრამ ვფიქრობ ამით, "ქართული ოცნება" თვითონ აჩქარებს თავისი პოლიტიკური სამარის გათხრას,"- ამბობს ბადრი ჯაფარიძე.

ბადრი ჯაფარიძე საქართველოს პროკურატურაში იმყოფება, სადაც მას ბრალი უნდა წარუდგინონ.

ცნობისთვის - მთავარმა პროკურატურამ მიხეილ სააკაშვილის, გიორგი ვაშაძის, ნიკა გვარამიას, ნიკანორ მელიას, ზურაბ გირჩი ჯაფარიძის, ელენე ხოშტარიას, მამუკა ხაზარაძის და ბადრი ჯაფარიძის მიმართ სისხლისსამართლებრივი დევნა დაიწყო.