მსოფლიო

ქართული ღვინო დიუსელდორფის საერთაშორისო გამოფენაზეა წარმოდგენილი

გერმანიის ქალაქ დიუსელდორფში ღვინისა და ალკოჰოლიანი სასმელების ყოველწლიურ საერთაშორისო გამოფენაში „პროვეინ-2019“ ქართული ღვინის მწარმოებელი 27 კომპანია მონაწილეობს.

გამოფენა წლის მთავარი მოვლენაა ღვინის მწარმოებლებისთვის მთელი მსოფლიოს მასშტაბით.

წელს გამოფენას მსოფლიოს 133 ქვეყნიდან 60 ათასამდე ღვინის პროფესიონალი და დაინტერესებული სტუმარი ეწვია, რაც კომპანიებისთვის ახალი კონტაქტებისა და იმპორტიორების მოძიების საუკეთესო შესაძლებლობაა. გამოფენაზე საკუთარი პროდუქცია 60-მდე ქვეყნის მეწარმეებმა წარადგინეს.

ქართული ღვინის მწარმოებელი კომპანიები გამოფენაში ღვინის ეროვნული სააგენტოს მხარდაჭერით და ასოციაცია „ქართული ღვინოს“ ორგანიზებით მონაწილეობენ. გამოფენას ღვინის ეროვნული სააგენტოს თავმჯდომარე ლევან მეხუზლა ესწრება.

„პროვაინი მსოფლიოში ყველაზე დიდი გამოფენაა, რომელშიც საქართველო 2000 წლიდან მონაწილეობს. გამოფენის მასშტაბებიდან და მნიშვნელობიდან გამომდინარე, ქართული კომპანიების მხრიდან ინტერესი მზარდია და წელს, საქართველო 27-მა კომპანიამ წარადგინა. ამით ჩვენ კიდევ უფრო ვამკვიდრებთ საქართველოს სახელს მსოფლიოს მევენახეობა-მეღვინეობის რუკაზე. 2021 წლიდან იგეგმება „პროვეინის“ გაფართოება და შესაბამისად, ჩვენც ვგეგმავთ, რომ საქართველო კიდევ უფრო მასშტაბურად იყოს წარმოდგენილი მასზე“, – აღნიშნა ლევან მეხუზლამ.

გამოფენა „პროვეინი“ წელს საიუბილეოა. იგი 25-ედ იმართება. საქართველო აღნიშნულ გამოფენაში 2000 წლიდან მონაწილეობს. თავდაპირველად, მონაწილეობას მხოლოდ 5 ქართული კომპანია იღებდა.

გამოფენის ფარგლებში ორ ქართულ კომპანიას „ევროპის ერთ-ერთ ყველაზე პრესტიჟულ საერთაშორისო კონკურსზე, “მუნდუს ვინიზე” მოპოვებული ჯილდოები გადაეცათ.

ინფორმაციას ღვინის ეროვნული სააგენტო ავრცელებს.