კომენტარი

„ქართულ ოცნებას“ უკვე აქვს ყველა შესაძლებლობა, რომ ყველა დაპირება, მათ შორის, ეკონომიკური შეასრულოს - გიორგი აბაშიშვილი

საქართველოს პრეზიდენტის ადმინისტრაციის უფროსის, გიორგი აბაშიშვილის განცხადებით, „წინა მოწვევის პარლამენტთანაც მოხდა გარკვეულ საკითხებზე თანამშრომლობა, მაგრამ სურვილი არის უფრო მეტის“.

ამის შესახებ აბაშიშვილმა ჟურნალისტებთან საუბარში, პრეზიდენტის პარლამენტში გამოსვლის დროს გაკეთებული აქცენტების კომენტირებისას განაცხადა.

„სწორედ ამიტომ, დღეს იყო პრეზიდენტის თვისობრივად განსხვავებული მიმართვა პარლამენტისადმი. პრეზიდენტი მზად არის კონსტრუქციული თანამშრომლობისთვის საქართველოს პარლამენტთან. თუმცა ამავდროულად, პრეზიდენტმა გაუსვა ხაზი იმას, რომ ის არასოდეს შეეგუება ინსტიტუტების დისკრედიტაციას და არასოდეს შეეგუება მოქალაქეთა კონსტიტუციური უფლებების დარღვევას“,-აღნიშნა აბაშიშვილმა.

მისი თქმით, მეცხრე მოწვევის პარლამენტში „ქართულ ოცნებას“ აქვს ყველა შესაძლებლობა იმისათვის, რომ შეასრულოს ყველა დაპირება, რომელიც მან წინასაარჩევნოდ გასცა.

„ვინაიდან არ არსებობს აღარანაირი ხელის შემშლელი ფაქტორები. საკონსტიტუციო უმრავლესობა არის ძლიერი ბერკეტი ამისათვის. „ქართულ ოცნებასთან“ საქართველოს მთავრობას აქვს შესანიშნავი თანამშრომლობა, ეროვნულ ბანკსაც მათ შორის. ასე რომ, ის ეკონომიკური პრობლემები და ეკონომიკური ტიპის დაპირებები, რომელიც „ქართული ოცნების“ მხრიდან გაიცა, ახლა შესაძლებელია რომ სრულად იქნას შესრულებული. ცხადია, საქართველოს პრეზიდენტი ყველა რეფორმას მხარს დაუჭრეს, იმ ჩარჩოში, რასაც ქვია ინსტიტუტების პატივისცემა“,-აღნიშნა აბაშიშვილმა.

მონიკა დავლიანიძე