მსოფლიო

პუტინი აცხადებს, რომ მზად არის შეხვდეს ზელენსკის, თუმცა ლეგიტიმურობას ეჭვქვეშ აყენებს

რუსეთის პრეზიდენტმა ვლადიმირ პუტინმა განაცხადა, რომ არ გამორიცხავს შეხვედრას უკრაინის პრეზიდენტ ვოლოდიმირ ზელენსკისთან, თუმცა მისი ლეგიტიმურობა, პუტინის თქმით, სერიოზულ კითხვებს აჩენს.

„ცნობისთვის, მე ვთქვი, რომ მზად ვარ შევხვდე ყველას, მათ შორის ზელენსკისაც. საქმე არ ამაშია. თუ უკრაინის სახელმწიფო ენდობა ვინმეს მოლაპარაკებების წარმოებაში — ღმერთმა ხელი მოუმართოს, იყოს ეს ზელენსკი. მაგრამ მთავარი კითხვა ისაა, ვინ მოაწერს ხელს დოკუმენტებს,“ — განაცხადა პუტინმა.

პუტინის თქმით, საკითხი მხოლოდ პროპაგანდის დონეზე არ უნდა განიხილებოდეს და მოლაპარაკებების შემთხვევაში აუცილებელია, რომ საბოლოო შეთანხმებებს ხელი ლეგიტიმურმა ხელისუფლებამ მოაწეროს.

„ყველა გენერალი ინიშნება პრეზიდენტის მიერ, ყველა მინისტრი, ყველა გუბერნატორიც. ეს არ არის სურვილზე დამოკიდებული. მაგრამ თუ პირველი პირი არ არის ლეგიტიმური, მაშინ მთლიანად მმართველობის სისტემა კარგავს ლეგიტიმურობას,“ — განაცხადა მან.

„არაფერს ვიგონებ. ჩვენთვის მნიშვნელოვანია, რომ ასეთი სერიოზული საკითხების გადაწყვეტისას დოკუმენტს ლეგიტიმური ხელისუფლების ხელმოწერა ამკვიდრებდეს. წინააღმდეგ შემთხვევაში, მოვა შემდეგი და ყველაფერს სანაგვეში გადააგდებს. ეს ხომ სერიოზული საქმეებია,“ — აღნიშნა პუტინმა.