მსოფლიო

პროვოკაცია უკრაინის ეკლესიის გამართიანებელ კრებაზე: უკრაინელმა სამართალდამცველებმა ორი შეიარაღებული პირი დააკავეს

კიევის ცენტრში სამართალდამცველებმა ორი შეიარაღებული პირი დააკავეს. ამის შესახებ ქალაქ კიევის ეროვნული პოლიციის მთავარი სამმართველოს უფროსმა, ანდრეი კრიშჩენკომ განაცხადა, როცა ის საუბრობდა კიევში უსაფრთხოების დაცვაზე უკრაინის ეკლესიის გამაერთიანებელი კრების ჩატარების გამო.

„ორი ადამიანი დავაკავეთ. ერთს ჰქონდა დანა, მეორეს კი ისეთი ჯოხები, ნუნჩაკუ [იაპონური საბრძოლო იარაღია]. ჩვენ იქ წავიყვანეთ პოლიციის ტერიტორიულ სამმართველოში და გავარკვევთ, რატომ მოვიდნენ ისინი ასეთ ღონისძიებაზე ასეთი სახიფათო იარაღით“, - დასძინა კრიშჩენკომ.

მისივე ინფორმაციით, სამართალდამცავი ორგანოები გაძლიერებულ რეჟიმში უკვე რამდენიმე დღეა მუშაობენ. კრიშჩენკოს თქმით, გაძლიერებულია დაცვა სოფიის ტაძრის მიმდებარე ტერიტორიაზე, სადაც კრება მიმდინარეობს, ასევე მიხაილოვის მოედანთან, ანდრეევის ეკლესიასთან და კიევ-პეჩერის ლავრასთან. მისივე თქმით, ამაში ჩართულია ეროვნული გვარდია და საგანგებო სიტუაციათა სამსახურის თანამშრომლები.

ცნობისთვის, ამჟამად კიევში, წმინდა სოფიის საკათედრო ტაძარში უკრაინის მართლმადიდებელი ეკლესიის გამაერთიანებელი კრება იმართება, რომელზეც უკრაინული სამღვდელოება უკრაინის ახალი ეკლესიის მეთაურს ირჩევს.

ახალი მეთაურის არჩევის შემდეგ, მოსალოდნელია, რომ უკრაინა მსოფლიო პატრიარქისგან ავტოკეფალიის ტომოსს მიიღებს. უკვე ცნობილია, რომ მსოფლიო პატრიარქი ბართლომე უკრაინის ეკლესიის მეთაურს აღნიშნულ დოკუმენტს საერთი ღვთისმსახურებაზე გადასცემს, რომელიც 2019 წლის 6 იანვარს გაიმართება.