კომენტარი

პრეზიდეტის შენიშვნები მიზნად ისახავდა სასამართლო სისტემის დამოუკიდებლობისა და დაცულობის ხარისხის ზრდას-გიორგი აბაშიშვილი

საქართველოს პრეზიდენტის ადმინისტრაციის უფროსისთვის, გიორგი აბაშიშვილისთვის გაუგებარია, თუ რატომ არ მოხდ, საქართველოს პარლამენტის მიერ გიორგი მარგველაშვილის მოტივირებული შენიშვნების გაზიარება.

როგორც აბაშიშვილმა საკითხის კომენტირებისას განაცხადა, პრეზიდენტის შენიშვნები მიზნად ისახავდა სასამართლო სისტემის დამოუკიდებლობისა და დაცულობის ხარისხის გაზრდას.

„გაუგებარია, თუ რატომ არ მოხდა საქართველოს პარლამენტის მხრიდან საქართველოს პრეზიდეტის მოტივირებული შენიშვნების გაზიარება, რომელიც მიზნად ისახავდა სასამართლო სისტემის დამოუკიდებლობისა და დაცულობის ხარისხის ზრდას და რომელიც ძირითადში, ემყარებოდა ვენეციის კომისიის ძალიან პრინციპულ მოსაზრებებს სწორედ სასამართლო სისტემასთან დაკავშირებით“,-აღნიშნა აბაშიშვილმა.

პრეზიდენტის საპარლამენტო მდივნის ანა დოლიძის შეფასებით კი, პარლამენტის უარი, პირველ რიგში, ვენეციის კომისიის პრინციპული პოზიციისადმი უარია.

„ეს უარი, პირველ რიგში, არის უარი ვენეციის კომისიის პრინციპული პოზიციების მიმართ, ამავე დროს, ეს არის გაშვებული შესაძლებლობა, რომ მეტი თავისუფლება მივანიჭოთ სასამართლოს, მეტი დეცენტრალიზაცია და მეტი ავტონომია მივცეთ მოსამართლეებს და უფრო დაცულები გავხადოთ ისინი“,-განაცხადა ანა დოლიძემ.

შეგახსენებთ, რომ გუშინ, პარლამენტმა "საერთო სასამართლოების" შესახებ კანონპროექტთან დაკავშირებით პრეზიდენტის მოტივირებული შენიშვნები არ გაიზიარა, კენჭი იმ ვარიანტს ეყარა, რომელსაც პრეზიდენტმა ვეტო დაადო. დეპუტატებმა მას 97 ხმით დაუჭირეს მხარი.

როგორც კენჭისყრის დასრულების შემდეგ პარლამენტის თავმჯდომარე ირაკლი კობახიძემ მედიას განუცხადა, პრეზიდენტის ვეტოს დაძლევა სასამართლოს სისტემის დამოუკიდებლობის ხარისხს არ შეამცირებს.

მონიკა დავლიანიძე