კომენტარი

პრეზიდენტის პოლიტიკურ გადაწვეტილებებს ნამდვილად ვერ შევაფასებ - გიორგი მიქაუტაძე

იუსტიციის უმაღლესი საბჭოს თავმჯდომარის მოვალეობის შემსრულებელი, გიორგი მიქაუტაძე გამოეხმაურა პრეზიდენტის გადაწყვეტილებას, არ წარადგინოს უზენაესი სასამართლოს თავმჯდომარეობის კანდიდატი.

„მე პრეზიდენტის პოლიტიკურ გადაწვეტილებებს ნამდვილად ვერ შევაფასებ უზენაესი სასამართლოს თავმჯდომარის კანდიდატის წარდგენასგან დაკავშირებით. სამართლებრივად ასეა, რომ ახალი პრეზიდენტის არჩევამდე მოქმედებს ძველი განაწესი. მას ჰქონდა უფლება, რომ წარედგინა უზენაესი სასამართლოს თავმჯდომარის კანდიდატი, თუმცა რატომ მიიღო ასეთი გადაწყვეტილება, სხვა შეფასებები იუსტიციის უმაღლესი საბჭოს კომპეტენციას სცდება", - განაცხადა მიქაუტაძემ.
კითხვაზე, არის თუ არა საბჭო მზად უზენაესი სასამართლოს თავმჯდომარეობის კანდიდატის წარსადგენად, მიქაუტაძემ უპასუხა, რომ ამაზე საბჭო იმსჯელებს.

„იუსტიციის უმაღლესი საბჭო ამ საკითხებზე ადრეც მსჯელობდა და მომავალშიც აუცილებდალ იმსჯელებს, თუ რა წესით უნდა მოხდეს უზენაესი სასამართლოში კანდიდატების წარდგენა. რასთან დაკავშირებითაც არ არის გამორიცხული, რომ სარეფორმო ჯგუფის სამუშაო შეხვედრებიც გაიმართოს და ერთობლივად ვიმსჯელოთ ამ თემაზე“, -თქვა მიქაუტაძემ.

მიქაუტაძემ მესამე სექტორის შენიშვნებზეც ისაუბრა, რომლებიც თვლიან, რომ პრეზიდენტმა არასწორი გადაწყვეტილება მიიღო, როცა უარი თქვა კანდიდატის წარდგენაზე.

„ეს საკონსტიტუციო რეფორმა როდესაც გატარდა, მივიღეთ ბევრად მეტი გარანტიები სასამართლოს სისტემის დამოუკიდებლობისთვის, ბევრად უფრო პროგრესული კანონმდებლობა და დღევანდელი მდგომარეობით, საკონსტუტუციო დონეზე გარანტირებულია სასამართლო სისტემის დამოუკიდებლობა. კიდევ უფრო გაძლიერდა ეს კომპონენტი და ამის ერთ-ერთი შემადგენელი ნაწილია სწორედ ის, რომ არა პოლიტიკური ხელისუფლება, არამედ თავად სასამართლო ხელისუფლება იქნება ჩართული იმ პროცესებში, რასაც ჰქვია უზენაესი სასამართლოს დაკომპლექტება და მოსამართლეების წარდგენა, რაც ვფიქრობ, სწორი და კარგი რეფორმა იყო როცა გატარდა“, -აღნიშნა მიქაუტაძემ.