მსოფლიო

პრეზიდენტის ადმინისტრაცია არასამთავრობო ორგანიზაციებთან და პარტიებთან კონსულტაციებს მართავს, რათა საკონსტიტუციო კომისია დატოვონ - ირაკლი კობახიძე

პარლამენტის თავმჯდომარის, ირაკლი კობახიძის განცხადებით, პრეზიდენტის ადმინისტრაცია აწარმოებს საკონსტიტუციო კომისიის წინააღმდეგ კამპანიას.

მისი თქმით, პრეზიდენტის ადმინისტრაცია ცალკეულ არასამთავრობო ორგანიზაციებთან და პარტიებთან კონსულტაციებს მართავს, რათა საკონსტიტუციო კომისია დატოვონ.

"დაახლოებით ერთი კვირის წინ მომაწოდეს სარწმუნო ინფორმაცია იმასთან დაკავშირებით, რომ კონსულტაციები იმართება ცალკეულ არასამთავრობო ორგანიზაციებთან და პარტიებთან პრეზიდენტის ადმინისტრაციის მხრიდან იმასთან დაკავშირებით, რომ მათ დატოვონ კომისიის რიგები. ეს არის ძალიან შემაშფოთებელი ინფორმაცია და იმედია, რომ ასეთ შედეგს ჩვენ არ ვიხილავთ“, - განაცხადა ირაკლი კობახიძემ პარლამენტის პლენარულ სხდომაზე პრეზიდენტის ყოველწლიური მოხსენების შეფასებისას.
მისივე თქმით, პრეზიდენტის ადმინისტრაცია ხელს უწყობს ქვეყანაში ორი ბანაკის ჩამოყალიბებას.

"პრეზიდენტმა ერთხელ თქვა, რომ მას სიტყვა არ გაურბის, მაგრამ მისი ადმინისტრაციის საჯარო მოხელეებს გაურბით სიტყვა და ეს იმას ნიშნავს, რომ სიტყვა პრეზიდენტს გაურბის", - თქვა პარლამენტის თავმჯდომარემ.

ნინო ექვთიმიშვილი