კომენტარი

პრეზიდენტი იყო ჭანჭიკი, რომელიც „ქართული ოცნების“ პოლიტიკას ასრულებდა-სერგო რატიანი

„პრეზიდენტი იყო ერთი პატარა ჭანჭიკი, რომელიც „ქართული ოცნების“ პოლიტიკას ასრულებდა“, – ასე გამოეხმაურა „ევროპული საქართველოს“ წევრი სერგო რატიანი პრეზიდენტის კრიტიკასთან და ახალი უმრავლესობის ფორმირებასთან დაკავშირებით პრეზიდენტის ადმინისტრაციის უფროსის, გიორგი აბაშიშვილის განცხადებას.

რატიანს აინტერესებს, თავად თუ სჯერა აბაშიშვილს თავისივე განცხადების „ქართული ოცნებისა“ და „ევროპული საქართველოს“ მონაწილეობით ახალი უმრავლესობის ფორმირების შესახებ.

„მე არ მინახავს ეს განცხადება და მინდა ჟურნალისტებს გკითხოთ, როდესაც ამას ამბობდა სახე სერიოზული ჰქონდა თუ ეცინებოდა? თვითონ თუ სჯერა იმ ბოდვის, რასაც ლაპარაკობს“, – კითხულობს რატიანმა.

„რაც შეეხება ჩვენ კრიტიკას, მე უნდა დავამშვიდო პრეზიდენტი. პრეზიდენტი იყო „ქართული ოცნების“ დანაშაულებრივი პოლიტიკის ერთი პატარა ჭანჭიკი, დიდი გავლენა არ ჰქონდა, მაგრამ იყო ჭანჭიკი და ასრულებდა იმას, რა პოლიტიკაც ჰქონდა „ქართულ ოცნებას“, დაკავშირებულს კრიმინალთან მიმართებაში. „ქართული ოცნების“ პოლიტიკა კი, კრიმინალთან მიმართებაში იყო ისეთი, რომ ათავისუფლებდნენ ჯაშუშებს, იწყალებდნენ დამნაშავეებს, რელიგიურ ექსტრემისტებს და ა.შ.“– განაცხადა რატიანმა.

შეგახსენებთ, რომ პრეზიდენტის ადმინისტრაციის უფროსმა, გიორგი აბაშიშვილმა განაცხადა, რომ საქართველოს პარლამენტში მიმდინარეობს ახალი საკონსტიტუციო უმრავლესობის ფორმირების პროცესი „ევროპული საქართველოსა“ და „ქართული ოცნების“ მონაწილეობით, მათი გამაერთიანებელი კი დღეს არის საქართველოს პრეზიდენტის წინააღმდეგ ბინძური კამპანიის წარმოება.

ცირა გურგენიძე