კომენტარი

პრეზიდენტ გიორგი მარგველაშვილის მიერ შეწყალებული პირების მხრიდან რეციდივის მაჩვენებელი ძალიან დიდია - თამარ ჩუგოშვილი

პარლამენტის პირველი ვიცე-სპიკერის, თამარ ჩუგოშვილის განცხადებით, პრეზიდენტ გიორგი მარგველაშვილის მიერ შეწყალებული პირების მხრიდან რეციდივის მაჩვენებელი ძალიან დიდია.

თამარ ჩუგოშვილი ამბობს, რომ პოლიტიკური პროცესი არაფერ შუაშია და უმრავლესობა მხოლოდ ფაქტებით საუბრობს.

“მიუხედავად იმისა, რომ შეწყალება ინდივიდუალური აქტია და მისი გამოყენება ინდივიდუალურ შემთხვევებში უნდა ხდებოდეს, გიორგი მარგველაშვილის მიერ 3600-ზე მეტი პირია შეწყალებული, მათ შორის 82 პროცენტი მძიმე და განსაკუთრებით მძიმე დანაშაულებში ბრალდებული პირია. 500-ზე მეტ შეწყალებულ პირს დანაშაული ხელახლა აქვს ჩადენილი. ანუ, რეციდივის მაჩვენებელი ძალიან დიდია. ხელახლა ჩადენილ დანაშაულებს შორის დიდი რიცხვია მძიმე და განსაკუთრებით მძიმე დანაშაულების, მათ შორის ოჯახში ძალადობაზე. ეს ობიექტური პრობლემაა და შეწყალების პოლიტიკა პრობლემური გახდა. ამაზე საუბარს პოლიტიკური სპეკულაციები არ სჭირდება, ეს ფაქტებია და თუ იმას ვამბობთ, რომ კრიმინალთან ეფექტური ბრძოლა გვინდა, პოლიტიკა რომელიც შეწყალებაზე მივიღეთ, საზოგადოების ამ სურვილს ხელს არ უწყობს”, – განაცხადა ჩუგოშვილმა.

შეგახსენებთ, რომ პრეზიდენტის ადმინისტრაციის უფროსმა, გიორგი აბაშიშვილმა განაცხადა, რომ საქართველოს პარლამენტში მიმდინარეობს ახალი საკონსტიტუციო უმრავლესობის ფორმირების პროცესი „ევროპული საქართველოსა“ და „ქართული ოცნების“ მონაწილეობით, მათი გამაერთიანებელი კი დღეს არის საქართველოს პრეზიდენტის წინააღმდეგ ბინძური კამპანიის წარმოება.

ცირა გურგენიძე