მსოფლიო

პოროშენკომ ორჯერ თუ სამჯერ შემომთავაზა პრემიერობა - მიხეილ სააკაშვილი

საქართველოს ყოფილი პრეზიდენტისა და ოდესის ექს-გუბერნატორის, მიხეილ სააკაშვილის მტკიცებით, უკრაინის პრეზიდენტმა პეტრო პოროშენკომ მას რამდენჯერმე შესთავაზა პრემიერობა, თუმცა მან უარი უთხრა.

„მან [პოროშენკომ] ორჯერ თუ სამჯერ შემომთავაზა პრემიერ-მინისტრის თანამდებობა, თუმცა უარი ვუთხარი. გულწრფელად აკეთებდა ამას თუ უნდოდა იაცენუკის გაღიზიანება, არ ვიცი. მაგრამ ის ამბობდა, რომ პრემიერ-მინისტრად დამნიშნავდა, რაზეც ვუპასუხე „მექნება საშუალება, რომ ნორმალური მინისტრები დავნიშნო? არ გინდა პარლამენტის შეცვლა? არჩევნების დანიშვნა?“ მან თქვა: „არა, უბრალოდ მინისტრი იქნები“. ვუპასუხე, რომ ამის გაკეთებას არ ვაპირებ“, - თქვა სააკაშვილმა არხ NewsOne-ის გადაცემაში „Большой вечер“.

სააკაშვილმა არნიშნა, რომ ოდესის გუბერნატორობის თანამდებობის დაკავება თავად ისურვა.

„არავის არ უნდოდა იქ წასვლა, რადგან რთული სიტუაცია იყო. რუსეთი ძალიან გვიტევდა. ყოველ მეორე დღეს ტერაქტები იყო. ხანდახან ვრცელდებოდა ინფორმაცია მოგონილ ტერაქტებზე. შიგნით ძალიან მყიფე სიტუაცია იყო“, - განმარტა ოდესის ექს-გუბერნატორმა.