კომენტარი

პირველად ხდება საქათველოს ისტორიაში, როდესაც სახალხო დამცველის მოხსენებას ყურადღებას აქცევენ საერთოდ - გია ვოლსკი

საპარლამენტო უმრავლესობის წევრის, გია ვოლსკის განცხადებით, შესაბამისმა უწყებებმა უნდა დაადასტურონ სახალხო დამცველის ანგარიშში მოხვედრილი შეფასებების კომპეტენტურობა.

„ვერ გეტყვით, ვეთანხმები თუ არ ვეთანხმები ფაქტია, რომ შენიშვნები, წინადადებები, რეკომენდაციები ბევრია. ფაქტია, რომ პირველად ხდება საქათველოს ისტორიაში, როდესაც სახალხო დამცველის მოხსენებას ყურადღებას აქცევენ საერთოდ და მის რეკომენდაციებზე დეტალურ ანგარიშს ისმენენ. კომპეტენტურმა სტრუქტურებმა უნდა მოგვახსენონ, არის თუ არა კომპეტენტური ის შეფასებები, რაც თუნდაც აფგან მუხთარლისთან დაკავშირებით არის. "რუსთავი 2"-თან, მაჩალიკაშვილებთან დაკავშირებით. ეს ის თემებია, რომელსაც ყურადღება უნდა მივაქციოთ. მაგრამ ამაზე სამსჯელოა,“-განაცხადა გია ვოლსკიმ.

სახალხო დამცველის 2016-2017 წლის ანგარიშში მოხვდა თემირლან მაჩალიკაშვილის საქმე, სადაც ომბუდსმენი პირველად მიუთითებს სიცოცხლის დაცვის უფლებაზე. ანგარიშში საუბარია ასევე აფგან მუხთარლის საქმეზე, სადაც სახალხო დამცველი ითხოვს, რომ მას დაზარალებულის სტატუსი მიენიჭოს. დოკუმენტში ასევე ომბუდსმენი მიუთითებს, რომ ციხეებში კვლავ მწვავედ დგას არაფორმალური მმართველობის და ე.წ. კანონიერი ქურდების პრობლემა.