კომენტარი

პირბადეების აქციაში პრობლემისადმი ყურადღების მიქცევა კრეატიულად მოხდა - მიხიელ გიორგაძე

კულტურისა და ძეგლთა დაცვის მინისტრმა ძეგლებზე პირბადეების გაკეთების აქციას გამოეხმაურა.

როგორც მიხეილ გიორგაძემ აღნიშნა, პრობლემისადმი ყურადღების მიქცევა საკმაოდ კრეატიულად განხორციელდა.

„მე ვფიქრობ, რომ პრობლემა იყო საკმაოდ კრეატულად დანახული და ამ პრობლემისადმი ყურადღების მიქცევა საკმაოდ კრეატიულად განხორციელდა. ერთადერთი რაზეც შევწუხდი, იყო ის, რომ იქ იყო ისეთი ძეგლები, სადაც აძრომა და პირბადის დამაგრება გარკვეულ რისკთანაა დაკავშირებული. რომ ჩამოვარდნილიყო ადამიანი დაზიანებას მიიღებდა. ამ ნაწილში ფრთხილად უნდა ვიყოთ. ძალიან კრეატიული იყო, მით უმეტეს, საერთოდ არ მესმის შეურაცხყოფა რა ნაწილში იგულისხმება, თავად ძეგლს ზიანი არ მიდგომია“, - განაცხადა გიორგაძემ.

გუშინ დილით თბილისის ძეგლების ნაწილს პირბადე ეკეთა. ამ დრომდე უცნობია, ვინ არის აღნიშნული აქციის ორგანიზატორი, ან რას გამოხატავს იგი, თუმცა სოციალური ქსელის მომხმარებელთა ნაწილი მიიჩნევს, რომ აქცია ჰაერის დაბინძურების პრობლემას უკავშირდება.

მონიკა დავლიანიძე