მსოფლიო

პერსონალური მონაცემების ბოროტად გამოყენების გამო ფეისბუკის მიმართ მკაცრი ზომები გატარდება - ევროკომისარი ვერა იუროვა

მსოფლიო, ფეისბუკი, Cambridge Analytica , ვერა იუროვა, ევროკავშირი, პერსონალური მონაცემები

იუსტიციის საკითხებში ევროკომისრის, ვერა იუროვას განცხადებით, სოციალური ქსელ ფეისბუკის მიმართ, რომელიც დიდ სკანდალში გაეხვა პერსონალური მონაცემების ბოროტად გამოყენების გამო, მკაცრი ზომები გატარდება.

„ფეისბუკის 50 მილიონი მომხმარებლის მონაცემების ბოროტად გამოყენება აბსოლუტურად მიუღებელია“, -უთხრა იუროვამ Bild am Sonntag-ს.

გამოცემის ინფორმაციით, იუროვამ ფეისბუკის ხელმძღვანელობისგან მოითხოვა ოფიციალური განცხადების გაკეთება შექმნილ სიტუაციასთან დაკავშირებით, მაგალითად, რა დოზით შეეხო აღნიშნული სკანდალი ევროპელ მომხმარებლებს.

იუროვას თქმით, აშშ-ის მთავრობამ და შესაბამისმა უწყებებმა ევროკავშირი დაარწმუნეს, რომ ისინი „ყველა ბრალდებას საკმაოდ სერიოზულად აღიქვამენ და მუშაობენ საჭირო ზომების გასატარებლად“.

„ეს სკანდალი უნდა იყოს ნიშანი ყველასთვის, რადგან იმას, როგორ ვეპყრობით პირად მონაცემებს, შეიძლება მასშტაბური შედეგები ჰქონდეს“, - აღნიშნა იუროვამ.

ბრიტანულმა კომპანიამ Cambridge Analytica-მ, რომელიც თანამშრომლობდა დონალდ ტრამპის წინასაარჩევნო შტაბთან, გამოიყენა ფეისბუკის აპლიკაცია, რომელიც სთავაზობდა მომხმარებლებს მათი ფსიქოლოგიური პორტრეტის შედგენას. აღნიშნული აპლიკაცია დაახლოებით 270 000-მა ადამიანმა დააყენა, რითიც მოხდა მათი პერსონალური მონაცემების განდობა. მარტის შუა რიცხვებში Cambridge Analytica დაადანაშაულეს იმაში, რომ ფეისბუკმომხმარებელთა პირადი მონაცემები მან გამოიყენა დონალდ ტრამპის წინასაარჩევნო კამპანიისთვის, თუმცა თვითონ კომპანია ამტკიცებს, რომ მან სრულიად გაანდგურა მიღებული ინფორმაცია. სკანდალში გაეხვა ფეისბუკი. პროტესტის ნიშნად, სოციალური ქსელის წინააღმდეგ წამოიწყეს კამპანია „წაშალე ფეისბუკი“.