კომენტარი

„პატრიოტთა ალიანსი“ „ქართული ოცნების“ მეორე ფრაქციაა - ნიკა მელიამ

ნაციონლაური მოძრაობის წევრის ნიკა მელიას განცხადებით, ნაციონალური მოძრაობა ბიძინა ივანიშვილის წინააღმდეგ კონსტიტუციურ და ყველა დემოკრატიულ მეთოდს გამოიყენებს.

ამის შესახებ ნიკა მელიამ მედიას ქუთაისის პარლამენტში განუცხადა.

მისი თქმით, ნაციონალური მოძრაობა მეცხრე მოწვევის პარლამენტში არაორდინალურ ვითარებაში იქნება, რადგან დღეს პარტიას სხვა გამოწვევაც აქვს, ვიდრე ეს 2012 წელს ჰქონდა.

„დღეს ვართ იმ ვითარებაში, როდესაც ყველამ ძალიან კარგად ვიცით, მთელმა წინასაარჩევნო კამპანიამ ჩაიარა ძალადობის, მუქარის, შანტაჟის, მოსყიდვის, წარმოუდგენელი ხარისხით ადმინისტრაციული რესურის გამოყენებით. ამ ყველაფრის შედეგად ჩვენ მივიღეთ პარლამენტში აბსოლუტურად ალოგიკურად არაპროპორციული, არაადეკვატური სურათი, როდესაც გვყავს პოლიტიკური ძალა, რომელსაც ქვეყნის მოსახლოების ნახევარმაც კი არ მისცა ხმა და იგი აღჭურვილია საკონსტიტუციო უმრავლესობით“,-აღნიშნა დეპუტატმა.

მისი თქმით, არ შეიძლება, რომ ბიძინა ივანიშვილს ებრძოლო მხოლოდ პარლამენტის სხდომათა დარბაზოდან.

„ბუნებრივია იქნება გამოყენებული ყველა კონსტიტუციური, დემოკრატიული, მისაღები ფორმა და მეთოდი, იმისათვის, რომ ძალიან მალე ჩვენ შევანჯღრიოთ ივანიშვილის რეჟიმი“,-განაცხადა მელიამ.

კითხვაზე, აპირებს თუ არა ნაციონალური მოძრაობა პარლამენტში ითანამშრომლოს მეორე ოპოზიციურ პარტიასთან, „პარტიოტთა ალიანსთან“, ნიკა მელიამ აღნიშნა, რომ „ნუ ვისაუბრებთ „ქართული ოცნების“ მეორე ფრაქციაზე. არის საკითხები, რის გარშემოც ტრიალს აზრი არ აქვს და დროის ხარჯვას“.

მონიკა დავლიანიძე