კომენტარი

პასუხისმგებლობას ხელისუფლება ვერ აიცილებს - რომან გოცირიძე

ნაციონალური მოძრაობის წევრის რომან გოცირიძის განცხადებით, ხელისუფლება ბათუმში განვითარებულ მოვლენებზე პასუხისმგებლობას ვერ აიცილებს.

რაც შეეხება მომხდარის ნაციონალური მოძრაობისადმი გადაბრალებას, გოცირიძე აღნიშნავს, რომ გადაბრალება - „ბევრი გვინახავს“.

„ხელისუფლება დამნაშავეა თუნდაც იმაში, რომ მან არ იმოქმედა დროულად და მთელი ქალაქი დასარბევად გაიმეტა 10 საათის განმავლობაში. ამიტომ, პასუხისმგებლობას ხელისუფლება ვერ აიცილებს. ხოლო გადაბრალება უამრავი გვინახია. ნაციონალური მოძრაობის სოლიდარობა იყო იმ ადამიანებისადმი, რომლებიც გამოთქვამდნენ უკმაყოფილებას ქალაქში. მაგრამ, ნაციონალურმა მოძრაობამ დაგმო ის ადამიანები, რომლებიც ხელისუფლების უმოქმედობითა და პროვოკატორების ხელშეწყობით, ფაქტობრივად არბევდნენ ქალაქს“,-აღნიშნა გოცირიძემ.

გიორგი კვირიკაშვილმა, გუშინ ბათუმში ყოფნის დროს 11-12 მარტს ქალაქში მომხდარ არეულობას მორიგჯერ გამოეხმაურა, და აღნიშნა რომ მომხდარზე პასუხისმგებლობა მთლიანად „ნაციონალური მოძრაობის კისერზეა“.

მონიკა დავლიანიძე