კომენტარი

პარლამენტის თავმჯდომარის განცხადება არის არაზუსტი და დამაზიანებელი ინფორმაცია პროცესისთვის - ანა ნაცვლიშვილი

პარლამენტის თავმჯდომარის განცხადება არის არაზუსტი და დამაზიანებელი ინფორმაცია პროცესისთვის, - განუცხადა ჟურნალისტებს ახალგაზრდა იურისტთა ასოციაციის ხელმძღვანელმა, ანა ნაცვლიშვილმა პარლამენტის თავმჯდომარის იმ განცხადების კომენტირებისას, რომლის თანახმადაც, პრეზიდენტის ადმინისტრაცია პარტიებსა და არასამთავრობო ორგანიზაციებთან მართავდა კონსულტაციებს კომისიის დატოვებასთან დაკავშირებით.

როგორც ანა ნაცვლიშვილმა აღნიშნა, კონსულტაციების შესახებ არაფერი სმენია და არც მსგავს მოლაპარაკებებში მონაწილეობდა.

„ჩვენთან კონსულტაციები არ ყოფილა. დარწმუნებით შემიძლია, ვთქვა, რომ პარტნიორ ორგანიზაციებთან რომ ყოფილიყო, ეს აუცილებლად მეცოდინებოდა. მგონია, რომ ეს არის არაზუსტი და დამაზიანებელი ინფორმაცია ზოგადად პროცესისთვის. თუ არასამთავრობო რაიმე ტიპის გადაწყვეტილებას იღებდნენ და მიიღებენ, როგორც კონსტიტუციასთან, ასევე სხვა საკითხებთან მიმართებაში, ეს არის არასამთავრობო ორგანიზაციების პოზიცია. არ არის საჭირო ვინმესთან მიბმა ჩვენი გადაწყვეტილების მიღების პროცესში“, - განაცხადა ანა ნაცვლიშვილმა.

ნინო ექვთიმიშვილი