კომენტარი

პარლამენტის სპორტის კომიტეტის თავმჯდომარის თანამდებობაზე ჩემი საკითხიც განიხილება- შოთა ხაბარელი

პარლამენტის სპორტის კომიტეტის თავმჯდომარის მოადგილის, შოთა ხაბარელის განცხადებით, კომიტეტის თავმჯდომარის თანამდებობაზე, სხვებთან ერთად, მისი კანდიდატურაც განიხილება.

როგორც ხაბარელმა მედიას განუცხადა, შესაბამისი გადაწყვეტილება პოლიტსაბჭოზე იქნება მიღებული.
„ამ დრომდე ღია არის სპორტის კომიტეტის თავმჯდომარის ადგილი. მე ვფიქრობ, რომ შესაბამისი გადაწყვეტილება იქნება მიღებული პოლიტსაბჭოზე. დაველოდოთ, სულ ცოტა დრო დარჩა ამ გადაწყვეტილების მიღებამდე. ვფიქრობ, თავმჯდომარე შესაბამისი კანდიდატი იქნება“,-აღნიშნა პარლამენტის წევრმა.

მისი თქმით, ის ფაქტი, რომ ამ დრომდე პოლიტსაბჭო კანდიდატურაზე ვერ შეჯერდა, უკავშირდება იმას, რომ ძალიან წონადი კანდიდატებია წარდგენილი.

„ძალიან წონადი კანდიდატებია და აქედან გამომდინარე მსჯელობა მიდის. ჩემი საკითხიც განიხილება. გამომდინარე იქიდან, რომ მე ოთხი წლის განმავლობაში კომიტეტში ვიყავი პირველი მოადგილე, გამოცდილება საკმაოდ არის დაგროვილი და ვფიქრობ, რომ თავს გავართმევ, თუ ეს საკითხი ჩემს სასარგებლოდ გადაწყდებოდა“,-აღნიშნა შოთა ხაბარელმა.

მისივე თქმით, ამჟამად მოქმედი პარლამენტის სპორტის კომიტეტის მოქმედმა თავმჯდომარემ ლერი ხაბელოვმა ახლად არჩეული პარლამენტის ამავე კომიტეტის თავმჯდომარის თანამდებობაზე უარი განაცხადა.

ამის შესახებ ხაბარელმა მედიას განუცხადა.

„ლერიმ ცალსახად აღნიშნა, რომ ის უნდა იყოს ოლიმპიური კომიტეტის პრეზიდენტი“,-განაცხადა ხაბარელმა.

მონიკა დავლიანიძე