კომენტარი

პარლამენტის მხრიდან პრეზიდენტის არჩევა უკან გადადგმული ნაბიჯია - ირმა ინაშვილი

პატრიოტთა ალიანსის ერთ-ერთი ლიდერის, ირმა ინაშვილის, განცხადებით, „ქართულმა ოცნებამ“ ჯერჯერობით ვერ წარადგინა მყარი არგუმენტი იმისა, თუ რატომ უნდა აირჩიოს პრეზიდენტი პარლამენტმა.

როგორც ინაშვილმა ჟურნალისტებთან საუბარში აღნიშნა, პრეზიდენტი საყოველთაო არჩევნების გზით უნდა იყოს არჩეული, რაც დემოკრატიის მაჩვენებელს ზრდის.

„განიხილება საკითხი, უნდა თუ არა აირჩიოს პრეზიდენტი პარლამენტმა. ძალიან მყარი არგუმენტები სჭირდება ამას და მე ვერ ვისმენ ჯერჯერობით „ქართული ოცნების“ მხრიდან ამ მყარ არგუმენტებს, თუ რატომ უნდა აირჩიოს პრეზიდენტი პარლამენტმა და რატომ არ უნდა ირჩევდეს პრეზიდენტს ხალხი საყოველთაო არჩევნების გზით. მე ვემხრობი იმას, რომ პრეზიდენტი ხალხმა აირჩიოს, იმიტომ, რომ საყოველთაო არჩევნები ეს არის დემოკრატიის გზაზე წინ გადადგმული ნაბიჯი. მე ვფიქრობ და მიმაჩნია, რომ პარლამენტის მხრიდან პრეზიდენტის არჩევა უკან გადადგმული ნაბიჯია. ამიტომ მჭირდება მყარი არგუმენტები, თუ რატომ ვდგამთ ან ნაბიჯს უკან დემოკრატიის გზაზე“,-აღნიშნა ინაშვილმა.

მონიკა დავლიანიძე