მსოფლიო

ოთხმა ქვეყანამ გააუქმა უკრაინისთვის რუსეთის სიღრმეში დარტყმების შეზღუდვები - ფრიდრიხ მერცი

გერმანიის კანცლერმა ფრიდრიხ მერცმა განაცხადა, რომ გერმანიამ, საფრანგეთმა, დიდი ბრიტანეთმა და აშშ-მ მოხსნეს ყველა შეზღუდვა, რომელიც უკრაინას უკრძალავდა რუსეთში სიღრმისეულ სამხედრო ობიექტებზე დარტყმების მიყენებას. ამის შესახებ მან 26 მაისს გერმანული საზოგადოებრივი მაუწყებლის WDR Europaforum-ის ეთერში განაცხადა.

მისი თქმით, ამიერიდან უკრაინას აქვს უფლება თავდაცვის მიზნით დაარტყას სამხედრო ობიექტებს რუსეთის ტერიტორიაზეც. „ეს არის ფუნდამენტური, ხარისხობრივი ცვლილება უკრაინის ომის წარმართვაში. მანამდე კი, ასეთი შესაძლებლობა მხოლოდ იშვიათ შემთხვევებში გამოიყენებოდა,“ — განაცხადა მერცმა.

გერმანიის კანცლერმა ყურადღება გაამახვილა იმაზე, რომ რუსეთი განუწყვეტლივ ბომბავს სამოქალაქო ინფრასტრუქტურას, მათ შორის — ქალაქებს, ბაგა-ბაღებს, საავადმყოფოებსა და მოხუცთა სახლებს. „უკრაინა ასეთ ქმედებებს არ მიმართავს, და ჩვენთვის მნიშვნელოვანია, რომ ასე გაგრძელდეს მომავალშიც,“ — აღნიშნა მან.

შეგახსენებთ, რომ 2024 წლის ნოემბერში აშშ-ის მაშინდელმა პრეზიდენტმა ჯო ბაიდენმა პირველად მისცა უკრაინას ნებართვა, გამოეყენებინა შორ მანძილზე მოქმედი ამერიკული იარაღი რუსეთის ტერიტორიაზე. მედიის ინფორმაციით, საუბარი იყო ძირითადად კურსკის ოლქზე და ეს ნაბიჯი მიღებულ იქნა ჩრდილოეთ კორეის მხრიდან ომში ჩარევის საპასუხოდ.

აღსანიშნავია, რომ ხელისუფლებაში მოსვლამდე მერცი მკაცრად აკრიტიკებდა თავის წინამორბედს, ოლაფ შოლცს, უკრაინისთვის Taurus-ის ტიპის რაკეტების მიწოდებაზე უარის თქმის გამო. მაშინ მერცი მოითხოვდა, რომ პუტინისთვის ულტიმატუმი წარედგინათ — თუ 24 საათში არ შეწყვეტდა ცეცხლს, უკრაინა ამ ტიპის იარაღს მიიღებდა.

თუმცა ხელისუფლებაში მოსვლის შემდეგ მერცმა რიტორიკა შეცვალა და განაცხადა, რომ კონკრეტული შეიარაღების მიწოდების საკითხი მხოლოდ პარტნიორებთან შეთანხმებით გადაწყდება.