მსოფლიო

ოპერაციის მესამე დღე - ტაილანდის მღვიმიდან კიდევ 5 ადამიანი უნდა გამოიყვანონ

ტაილანდის ჩრდილოეთით მდებარე ტჰამ ლუანგის მღვიმეში ჩარჩენილი მოზარდებისა და მათი საფეხბურთო მწვრთნელის საევაკუაციო პროცესი გრძელდება. ოპერაციის მესამე დღეს მყვინთავებმა გამოქვაბულში დარჩენილი 5 ადამიანი უნდა გამოიყვანონ.

ტაილანდის საზღვაო ქვედანაყოფის განცხადებით, დღევანდელი ოპერაცია ჩვეულებრივზე დიდხანს გაგრძელდება. ქვედანაყოფმა იმედი გამოთქვა, რომ საევაკუაციო პროცესი დღესვე დასრულდება და დასძინა, რომ ყველა „ერთად იზეიმებს“.

ორი დღის განმავლობაში მყვინთავებმა 8 ბიჭის გამოყვანა შეძლეს. მღვიმეში კიდევ 4 მოზარდი და მათი მწვრთნელი რჩებიან.

რაც შეეხება გადარჩენილი მოზარდების ჯანმრთელობის მდგომარეობას, ისინი საავადმყოფოში რჩებიან.

ტაილანდის ჯანდაცვის მინისტრის პრესსამსახურის ინფორმაციით, ისინი კარგად არიან, ხოლო ექიმების მეთვალყურეობის ქვეშ ერთი კვირის განმავლობაში დარჩებიან. ბავშვებს ინფექციის ნიშნები აღენიშნებათ. გარდა ამისა, მოზარდებს სათვალეები უკეთიათ, რადგან ისინი 2 კვირის განმავლობაში სიბნელეში იმყოფებოდნენ.

23 ივნისს 11-დან 17 წლამდე ასაკის ბავშვები თავის მწვრთნელთან ერთად გამოქვაბულში ჩარჩნენ უეცრად წამოსული ძლიერი წვიმის გამო, რომელმაც იქაურობა წყლით დაფარა. მოზარდები და მათი მწვრთნელი ბრიტანელმა მყვინთავებმა 9-დღიანი ძებნის შემდეგ აღმოაჩინეს გამოქვაბულის სიღრმეში, შესასვლელიდან ოთხი კილომეტრის მანძილზე.