კომენტარი

ონში მომხდარი იყო ყოფითი დაპირისპირება, პოლიტიკა და „ქართული ოცნება“ არაფერ შუაშია - კახა კალაძე

ონში მომხდარი იყო ყოფითი დაპირისპირება, პოლიტიკა და „ქართული ოცნება“ არაფერ შუაშია, – განაცხადა თბილისის მერმა კახა კალაძემ.

მისი თქმით, ძალიან სამწუხაროა, რაც მოხდა და კანონის წინაშე ყველა აგებს პასუხს.

„ეს იყო ყოფითი დაპირისპირება. პოლიტიკა და „ქართული ოცნება“ არაფერ შუაშია. პიროვნებას, ვისთანაც დაპირისპირება მოუვიდათ „ქართული ოცნების“ პარტიასთან არანაირი შეხება არ აქვს. ძალიან სამწუხაროა, რაც მოხდა და კანონის წინაშე მოუწევს ყველას პასუხისგება“, – განაცხადა კახა კალაძემ.

შსს-ს ინფორმაციით, ამ ეტაპზე დგინდება, რომ ონში მომხდარი დანაშაული პოლიტიკური მოტივით არ არის ჩადენილი და კონფლიქტი ყოფით ნიადაგზე წარმოიშვა.

როგორც უწყებაში აცხადებენ, ონში მომხდარი დანაშაულის შემსწრე დაცვის პოლიციის თანამშრომელს გამოძიების დასრულებამდე სამსახურებრივი უფლებამოსილება შეუჩერდა.

,,გამოძიებით დადგენილია, რომ 1965 წელს დაბადებული ბრალდებული 22 ნოემბერს, ღამის საათებში მივიდა მეგობართან გასაღების გამოსართმევად. ბრალდებული ქუჩიდან ხმამაღლა ეძახდა მეგობარს. აღნიშნულ ხმაურზე იქვე მეზობლად მცხოვრებმა ნოდარ ბურდილაძემ საკუთარი სახლის აივნიდან გადმოიხედა და ხმაურის გამო შენიშვნა მისცა ბრალდებულს, რაზეც არაფხიზელ მდგომარეობაში მყოფი ბრალდებული გაღიზიანდა. მათ შორის ჯერ სიტყვიერი დაპირისპირება დაიწყო, რომელიც შემდგომ ფიზიკურ დაპირისპირებაში გადაიზარდა. ნოდარ ბურდილაძეს ბრალდებულმა კ.ი.-მ დანით ჭრილობა მიაყენა. დანიშნულია შესაბამისი ექსპერტიზები დაზიანების ხარისხის და მიყენების მექანიზმის დასადგენად.

სამართალდამცველებმა, ცხელ კვალზე ჩატარებული ოპერატიულ-სამძებრო ღონისძიებების შედეგად, კ. ი. მომხდარიდან მალევე მკვლელობის მცდელობის ბრალდებით დააკავეს. იმის გათვალისწინებით, რომ საქმეში ფიგურირებს ფაქტის შემსწრე, შსს სსიპ დაცვის პოლიციის დეპარტამენტის იმერეთი-გურიის სამმართველოს თანამშრომელი, საქმე გამოსაძიებლად გადაეცა საქართველოს პროკურატურას, ხოლო დაცვის პოლიციის თანამშრომელს გამოძიების დასრულებამდე შეუჩერდა სამსახურეობრივი უფლებამოსილება", - ნათქვამია შსს-ს განცხადებაში.

ნინო ექვთიმიშვილი