კომენტარი

ონლაინ სესხების კომპანიებმა თავიანთი ბიზნესი ოფშორში რომ გადაიტანონ, ინტერნეტს ხომ არ დავბლოკავთ ამის გამო?! - ვახტანგ მეგრელიშვილი

ახალი პოლიტიკური ცენტრის „გირჩის“ ერთ-ერთმა ლიდერი ვახტანგ მეგრელიშვილი ონლაინ სესხების აკრძალვის საკითხს გამოეხმაურა.

როგორც მეგრელიშვილმა პრესკონფერენციაზე აღნიშნა, შეუძლებელია რაღაცეები აკრძალო, თუ არსებობს მოთხოვნა სწრაფად ფინანსური რესურსის მოძიებაზე და როგორც ადასტურებს რეალობა, ნამდვილად არსებობს ეს მოთხოვნა.

„ამიტომაც გაჩნდა ზუსტად ონლაინ სესხები და თუ დინამიკას დააკვირდებით, ონლაინ სესხების პროცენტები, ანუ საპროცენტო განაკვეთები მუდმივად კლებადია მისი დაწყების მომენტიდან. ონლაინ სესხები თავისი სწრაფი პროცედურებით, იღებს მაღალ პროცენტს იმიტომ, რომ ეს პროცენტი არის ღირებულება იმ რისკის, რომ ადამიანებმა ვეღარ დააბრუნონ, ან აღარ დააბრუნონ სესხები. შესაბამისად, თუ ამას ავკრძალავთ, ეს ბიზნესი გადაინაცვლებს ექსტრალეგალურ სივრცეში“,-განაცხადა მეგრელიშვილმა.

მისი თქმით, „ქართულმა ონლაინ სესხების კომპანიებმა თავიანთი ბიზნესი ოფშორში რომ გადაიტანონ, ინტერნეტს ხომ არ დავბლოკავთ ამის გამო?“

„თუ ეს უბრალოდ პოპულიზმია და იმ ადამიანების გულის მოგებაზეა გათვლილი, რომლებსაც უკვე აქვთ ონლაინ სესხი აღებული, ძალიან ფუჭი იმედი ექნებათ თუ მათ ჰგონიათ, რომ არ მოუწევთ ამ თანხის უკან დაბრუნება. შესაბამისად, ძალიან გაუგებარია. მაშინ გამოდის, რომ მთავრობამ აქაც უნდა დაასუბსიდიროს“,-განაცხადა „გირჩის“ წევრმა.

მონიკა დავლიანიძე