კომენტარი

ნუგზარ ჭონქაძე არის კარგი თამადა - კახა კალაძე საკრებულოს ოპოზიციას პასუხობს

თბილისის მერმა საკრებულოს ოპოზიციის მოთხოვნას უპასუხა, რომელიც უსაფრთხოების სამსახურის უფროსის თანამდეობაზე წარდგენილი ნუგზარ ჭონქაძის კანდიდატურის შეცვლას ითხოვს.

კალაძის თქმით, იგი ჭონქაძის კანდიდატურის შეცვლას არ აპირებს.

„ნუგზარ ჭონქაძეს მინდა წარმატებები ვუსურვო. უსაფრთხოების სამსახური ძალიან მნიშვნელოვანი სამსახურია და დარწმუნებული ვარ, რომ ის გაართმევს თავს ამ დაკისრებულ ვალდებულებას“,- აღნიშნა დედაქალაქის მერმა.

კითხვაზე, ანუ არ აპირებთ მისი კანდიდატურის გადახედვას? კალაძე კითხვითვე პასუხობს „რატომ?“.

„რა დააშავა ადამიანმა? რა წარსული აქ ამ ადამიანს?! წლების განმავლობაში მუშაობდა სახელმწიფო უსაფრთხოების სამსახურში, წლების განმავლობაში მუშაობდა საფინანსო პოლიციაში, წლების განმავლობაში იყო „პროგრეს ბანკის“ უსაფრთხოების ხელმძღვანელი. სხვა რომელ წარსულზე მელაპარაკებით? არის ჩოხოსანი, არის კარგი თამადა“,-აღნიშნა კალაძემ.

თბილისის საკრებულოს ფრაქცია „ნაციონალური მოძრაობა“ ნუგზარ ჭონქაძის კანდიდატურას ეწინააღმდეგება, რადგან მათი თქმით, იგი ქსენოფობიური და ჰომობიური განცხადებებით გამოირჩევა, გარდა ამისა, მათი თქმით, ჭონქაძე ოპოზიციურ პარტიების და პირველ რიგში „ნაციონალური მოძრაობის“ მიმართ არის აგრესიულად განწყობილი.

მონიკა დავლიანიძე