მსოფლიო

ნიკოლ პაშინიანი სომხეთის პრემიერ-მინისტრი გახდა

სომხეთს ახალი პრემიერი ჰყავს, ეროვნულმა კრებამ მხარი დაუჭირა საპარლამენტო ოპოზიციური ფრაქცია „ელქის“ [გამოსავალი] პრემიერობის კანდიდატ ნიკოლ პაშინიანს.

ერთადერთმა კანდიდატმა 59-მა დეპუტატმა მხარდაჭერა გამოუცხადა, ხოლო 42-მა მის წინააღმდეგ მისცა ხმა.

ერევნის რესპუბლიკის მოედანზე ათობით ათასი მოქალაქე კენჭისყრის პროცესს პირდაპირ ეთერში აკვირდებოდა.

პაშინიანს ხმა მისცეს როგორც „ელქმა“, ასევე „ცარუკიანის“ ბლოკმა, „დაშნაკცუტუნმა“ და მმართველი ფრაქცია სომხეთის რესპუბლიკური პარტიის რამდენიმე წევრმა. სულ პაშინიანს პრემიერ-მინისტრობისთვის 105-ადგილიან პარლამენტში 53 ხმაც ჰყოფნიდა.

წინა კვირას ჩატარებულ არჩევნებში პაშინიანმა საჭირო ხმების რაოდენობა ვერ დააგროვა. პრემიერობის ერთადერთ კანდიდატს ეროვნული კრების 45-მა დეპუტატმა მისცა ხმა, ხოლო მმართველი ფრაქცია სომხეთის რესპუბლიკური პარტიის 56-მა წევრმა მას მხარი არ დაუჭირა.

კენჭისყრის მომდევნო დღეს პაშინიანის ხელმძღვანელობით ქვეყანაში მასშტაბური გაფიცვა გაიმართა. ათი ათასობით ადამიანმა მაგისტრალები და სარკინიგზო მოძრაობა გადაკეტა, პარალიზებული იყო მეტრო.

2 მაისს მმართველ რესპუბლიკურ პარტიაში განაცხადეს, რომ თავისი კანდიდატი არ ეყოლებათ და იმას მისცემენ ხმას, ვისაც პარლამენტართა მესამედის (35 ხელმოწერა) მხარდაჭერა ექნება. უმრავლესობაში აღნიშნეს, რომ „8 მაისს სომხეთს პრემიერ-მინისტრი ეყოლება“. მომდევნო დღეს „ელქმა“ 41 ხელმოწერით პრემიერობის კანდიდატად ნიკოლ პაშინიანი წარადგინა.