მსოფლიო

ნიკოლ პაშინიანი ხელახლა წარადგინეს სომხეთის პრემიერობის კანიდატად, მას პარლამენტის მესამედზე მეტი უჭერს მხარს

სომხეთის ოპოზიციურმა საპარლამენტო ფრაქცია „ელქმა“ [გამოსავალი] 41 ხელმოწერით პრემიერობის კანდიდატად ნიკოლ პაშინიანი წარადგინა.

წარდგენამდე ფრაქციის წარმომადგენელმა არარათ მირზოიანმა რადიო თავისუფლების სომხურ სამსახურს განუცხადა, რომ ხელმომწერთა შორის არიან საპარლამენტო ფრაქცია „დაშნაკცუტუნისა“ და „ცარუკიანის“ ბლოკის წევრები.

სომხეთის ეროვნულ კრებაში პრემიერის ხელახალი არჩევნები 8 მაისს გაიმართება.

1 მაისს ჩატარებულ არჩევნებში პარლამენტის უმრავლესობამ არ დაუჭირა მხარი პრემიერობის ოპოზიციონერ კანდიდატ ნიკოლ პაშინიანს. მან ვერ დააგროვა საჭირო 53 ხმა. პრემიერობის ერთადერთ კანდიდატს ეროვნული კრების 45-მა დეპუტატმა მისცა ხმა, ხოლო მმართველი ფრაქცია სომხეთის რესპუბლიკური პარტიის 56-მა წევრმა მას მხარი არ დაუჭირა.

კენჭისყრის მომდევნო დღეს პაშინიანის ხელმძღვანელობით ქვეყანაში მასშტაბური გაფიცვა გაიმართა. ათი ათასობით ადამიანმა მაგისტრალები და სარკინიგზო მოძრაობა გადაკეტა, პარალიზებული იყო მეტრო.

2 მაისს მმართველ რესპუბლიკურ პარტიაში განაცხადეს, რომ თავისი კანდიდატი არ ეყოლებათ და იმას მისცემენ ხმას, ვისაც პარლამენტართა მესამედის (35 ხელმოწერა) მხარდაჭერა ექნება. უმრავლესობაში აღნიშნეს, რომ „8 მაისს სომხეთს პრემიერ-მინისტრი ეყოლება“.

მმართველი ფრაქციის პოზიციის გამო პაშინიანმა აქციები შეაჩერა. 2 მაისს გამართულ მასშტაბური საპროტესტო მიტინგზე პაშინიანმა განმარტა, რომ მისი კანდიდატურის წარდგენასთან დაკავშირებით ის შეხვედრებს გამართავს ეროვნულ კრებაში.

თუკი 8 მაისს ისევ ვერ აირჩევენ პრემიერ-მინისტრს, სომხეთის პრეზიდენტი იძულებული გახდება, პარლამენტი დაითხოვოს და 30-45 დღის განმავლობაში დანიშნოს ხელახალი საპარლამენტო არჩევნები.