მსოფლიო

ნატოს გენერალური მდივანი სირიაში განხორციელებულ იერიშს მხარს უჭერს

ნატოს გენერალურმა მდივანმა იენს სტოლტენბერგმა მხარი დაუჭირა კოალიციური ძალების იერიშს სირიის მთავრობის ქიმიური იარაღის საწარმოებზე. მან განაცხადა, რომ ჩრდილო-ატლანტიკური ალიანსისთვის მიუღებელია ქიმიური იარაღის გამოყენება.

„მხარს ვუჭერ აშშ-ის , დიდი ბრიტანეთისა და საფრანეთის მოქმედებებს სირიის რეჟიმის ქიმიური იარაღის საწარმოებისა და შესაძლებლოების წინააღმდეგ. ნატო მიიჩნევს, რომ ქიმიური იარაღის გამოყენება მიუღებელია. ამაზე პასუხიმსგებელმა პირებმა პასუხი უნდა აგონ“, - განაცხადა სტოლტენბერგმა.

აშშ-ის პრეზიდენტმა დონალდ ტრამპმა სირიაზე იერიშის მიტანის ბრძანება გასცა. კოალიციურმა ძალებმა, რომლებშიც შედიან აშშ, დიდი ბრიტანეთი და საფრანგეთი, სირიაში სამიზნეებზე ავიადარტყმები განახორციელეს.

ცნობისთვის, 7 აპრილს სირიის ქალაქ დუმაზე განხორციელებული ავიაიერიშის შედეგად 70 ადამიანი დაიღუპა, აქედან 43-ს დაუდგინდა სიმპტომები, რომლებიც ქიმიურ თავდასხმაზე მიუთითებდა.

დასავლეთი მომხდარში სირიის მთავრობას ადანაშაულებს, თუმცა ბაშარ ალ-ასადის რეჟიმი რამე მონაწილეობას უარყოფს. ასადის პარტნიორი რუსეთი კი დასავლელი ლიდერების განაცხადებებს ქიმიური თავდასხმის შესახებ, „პროვოკაციას“ უწოდებს.