კომენტარი

ნატო-ს საპარლამენტო ასამბლეის ყოფილი პრეზიდენტი საქართველოს მოსახლეობისთვის სესხების განულების დაპირებას ამომრჩევლის მოქრთამვად აფასებს

ნატო-ს საპარლამენტო ასამბლეის ყოფილი პრეზიდენტი, რასა იუკნევიჩიენე მიიჩნევს, საქართველოს მოსახლეობისთვის სესხების განულების დაპირება ამომრჩევლის მოქრთამვაა.

შესაბამისი განცხადება რასა იუკნევიჩიენემ „ამერიკის ხმის“ ქართული ბიუროსთვის მიცემულ ინტერვიუში გააკეთა.

„გავიგე ამის შესახებ. გასულ კვირას ჰალიფაქსში ქართველ პარლამენტარებს შევხვდი და მათ განმიმარტეს, თუ რას ნიშნავს ეს ჟესტი. რასაკვირველია, ეს მოქრთამვაა. შეუძლებელია ამის სხვაგვარად დანახვა და ის ცალსახად მიუღებელია“, - განაცხადა რასა იუკნევიჩიენემ.

აქვე ნატო-ს საპარლამენტო ასამბლეის ყოფილი პრეზიდენტი საქართველოში არასამთავრობო სექტორსა და მთავრობას შორის ბოლო პერიოდში გახშირებულ ურთიერთბრალდებებსაც გამოეხმაურა.

,,ყველა დამკვირვებელმა აღნიშნა, რომ ეს რაღაც ახალი იყო, რომ მთავრობის წარმომადგენლები დემოკრატიის ამ საფუძველს, არასამთავრობო სექტორს, სასტიკად ესხმოდნენ თავს. მე გავიგე ისე, თითქოს მთავრობას სურს, რომ არასამთავრობო ორგანიზაციები მას ემსახურებოდნენ. ეს მიუღებელია", - აცხადებს რასა იუკნევიჩიენე.