კომენტარი

ნატო ჩხეიძე: ცდილობს თხუნელასავით მიწაში ჩაძვრეს და ისე მართოს ეს ქვეყანა ორი-სამი ადამიანის კავშირებით

ქვეყნის მართვიდან არ მიდის ივანიშვილი, - მარტო თვალს ეფარება და ჰგონია, რომ ასე მარტივად აიცილებს ხალხის რისხვას - ჩვენი მოსახლეობის თუ საერთაშორისო საზოგადოების, - ამის შესახებ გაერთიანებული ოპოზიციის წევრმა, მოძრაობა „სახელმწიფო ხალხისთვის“ პოლიტიკურმა ლიდერმა, ნატო ჩხეიძემ განაცხადა.

„ივანიშვილი არსად წასვლას არ აპირებს, სულ პირიქით კი.

იგი ცდილობს ხელმეორედ შექმნას ილუზია, რომ ქვეყნის მართვაში არ ჩაერევა და ერთ- ერთი მოქალაქე და კერძო პირი იქნება. რაც, ცხადია, სიყალბეა.

სინამდვილეში ის ცდილობს აიცილოს პასუხისმგებლობა ქვეყანაში შექმნილ კრიზისებზე და სამარცხვინოდ ქცეულ ქართული ოცნების პარტიაზე და ქვეყნის უკუსვლა დაბრალდეს ცალკეულ ჩინოვნიკებს, რომლებიც სწორედ ივანიშვილის ხელშეწყობით, წაქეზებით და ბრძანებით ასრულებდნენ იმ კორუფციულ სქემებს, რამაც გაღატაკებამდე მიიყვანა ჩვენი მოსახლეობა და კიდევ უფრო გამდიდრებამდე თვითონ ივანიშვილი.

ახლა იგი ცდილობს გადამალოს ეს კორუფციული ქონება და გადამალოს თავის თავიც!..

ცდილობს თხუნელასავით მიწაში ჩაძვრეს და ისე მართოს ეს ქვეყანა ორი-სამი ადამიანის კავშირებით.

ეს არის მისი წერილის და ინტერვიუს დედააზრი - ისევ თავის თავის ქება, ისევ ოპოზიციის ძაგება და ისევ მოსახლეობის დამუნათება.

ასე, რომ ქვეყნის მართვიდან არ მიდის ივანიშვილი, - მარტო თვალს ეფარება და ჰგონია, რომ ასე მარტივად აიცილებს ხალხის რისხვას - ჩვენი მოსახლეობის თუ საერთაშორისო საზოგადოების.

და სწორედ ეს მისი დაწუნებული ოპოზიცია და ეს მისი დამუნათებული ხალხი წაადგება მას იმ მიწისქვეშეთში და ამოიყვანს დღის სინათლეზე, რათა თვალი გაუსწოროს პასუხისმგებლობას იმ დანაშაულებების გამო, რაც ამ რვა წლის განმავლობაში უსულგულოდ და ულმობლად აკეთა ჩვენს ქვეყანაში.“ - დაწერა ნატო ჩხეიძემ.