კომენტარი

ნატო ჩხეიძე ფადი ასლის პასუხობს: ,,ომეგა ჯგუფზე“ როცა ლაპარაკობს, ძალიან უხერხულია ის სიტყვები გამოიყენოს, რაც მან გამოიყენა (ვიდეო)

პარლამენტის წევრი, ნატო ჩხეიძე საერთაშორისო სავაჭრო პალატის თავმჯდომარის, ფადი ასლის განცხადებას პასუხობს.

ჩხეიძე ფადი ასლის მოუწოდებს, კარგად შეისწავლოს ,,ომეგა ჯგუფის“ საქმიანობა.

,,როდესაც ფადი ასლი რაიმე ლობისტურ განცხადებებს აკეთებს მისთვის სასურველი კომპანიის მიმართ, ვფიქრობ, რომ უფრო კარგად უნდა შეისწავლოს იმ ჯგუფის საქმიანობა, ვისზეც ასეთ აზრებს გამოთქვამს.

,,ომეგა ჯგუფი“ არის დიდი და წარმატებული ჯგუფი საქართველოში. ,,ომეგა ჯგუფს“ აქვს უამრავი ინვესტიცია საქართველოში შემოტანილი, ,,ომეგა ჯგუფს“ ჰყავს დასაქმებული უამრავი ხალხი. ,,ომეგა ჯგუფს“ ჰყავს მსოფლიო მნიშვნელობის ბიზნეს პარტნიორები. ასეთ ჯგუფზე როცა ლაპარაკობს, ძალიან უხერხულია, რომ ის სიტყვები გამოიყენოს, რაც მან გამოიყენა. მით უმეტეს, როდესაც ლობიზმს უწევს ისეთ ორგანიზაციას, რომელსაც არანაირი ინვესტიცია საქართველოში არ შემოუტანია, არცერთი ადამიანი არ დაუსაქმებია თავის საკუთარ ფირმაში რამდენიმე ადამიანის გარდა, არაფერი არ შეუტანია ბიუჯეტში და არაფერი არ გაუკეთებია საქართველოსთვის. ხოლო ის მოგება, რომელსაც ,,ბრითიშ ამერიქან თობაქო“ საქართველოში ნახულობს, მიაქვს სხვაგან, სხვა ქვეყანაში.

როდესაც ასეთ კომპანიას უწევს ლობიზმს, მე არა მგონია, რომ ეს იყოს საქართველოსთვის სასარგებლო მოქმედება. თუმცა, არც არის გასაკვირი, როდესაც ეს ბატონი სწორედ ისეთი კომპანიის მხარეზეა, რომელზეც ახლა გესაუბრეთ“, - აცხადებს ნატო ჩხეიძე ჟურნალისტებთან საუბარში.

ცნობისათვის, ფადი ასლიმ გუშინ „ომეგა ჯგუფი“ ხელისუფლებაზე უსამართლო თავდასხმაში დაადანაშაულა.