კომენტარი

ნარკოპოლიტიკა უნდა მივიღოთ ქვეყნის ინტერესებიდან გამომდინარე და არა მისთვის, რომ ვიღაცას გული მოვფხანოთ - დიმიტრი ხუნდაძე

ქვეყანაში ნარკოპოლიტიკა უნდა შეიცვალოს, მაგრამ არა ნარკოტიკების პოპულარიზაციის გზით, - განაცხადა პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარის პირველი მოადგილემ, დიმიტრი ხუნდაძემ.

მისი თქმით, პარლამენტმა ნარკოპოლიტიკის შესახებ კანონი ქვეყნის და არა კონკრეტული პირების ინტერესებიდან გამომდინარე უნდა მიიღოს.

„ქვეყანაში ნარკოპოლიტიკა უნდა შეიცვალოს, მაგრამ არა ნარკოტიკების პოპულარიზაციის გზით. ნარკოპოლიტიკა შესაცვლელია, მაგრამ უნდა იყოს მთავარი მიზანი დასახული, რომ მივიღოთ იმდაგვარი სამართლებრივი რეგულაციები, რომლებიც ხელს შეუწყობს ქვეყანაში ნარკოტიკების მომხმარებელთა რიცხვის შემცირებას და არა გაზრდას. ნარკოპოლიტიკა უნდა მივიღოთ ქვეყნის ინტერესებიდან გამომდინარე და არა მისთვის, რომ ვიღაცას გული მოვფხანოთ,“ - განაცხადა ხუნდაძემ.

მისივე თქმით, კანონპროექტი პარლამენტში უნდა განიხილებოდეს ყოველგვარი ზეწოლის გარეშე, სხვადასხვა უწყების მონაწილეობით.