კომენტარი

ნაირა გელაშვილის აზრი არ მაღელვებს, იმიტომ რომ მგონია, რომ ფაშისტია - ნიკა გვარამია

ტელეკომპანია „რუსთავი 2“-ის გენერალურმა დირექტორმა - ნიკა გვარამიამ კომენტარი გააკეთა მწერალ ნაირა გელაშვილის მიერ ტოლერანტობის კულტურის განვითარებაში შეტანილი წვლილისთვის მიღებული სიგელის უკან დაბრუნებაზე.

ამ ფორმით გელაშვილმა გააპროტესტა, რომ სახალხო დამცველთან არსებულმა რელიგიათა საბჭომ 16 ნოემბერს იგივე ჯილდო გადასცა „ევროპული საქართველოს“ ერთ-ერთ ლიდერ გიგა ბოკერიასა და ტელეკომპანია „რუსთავი 2“-ს.

როგორც გვარამიამ ტვ „იმედს“ განუცხადა, მისთვის გელაშვილის აზრი მნიშვნელოვანი არაა და ის ამაყობს ამ ჯილდოთი.

„ნაირა გელაშვილი არ მიმაჩნია მნიშვნელოვან და საინტერესო ფიგურად, მიმაჩნია ძალიან კარგ მწერლად, მაგრამ მისი აზრი საზოგადოებრივ მოვლენებზე არ მაღელვებს, იმიტომ რომ მგონია, რომ ფაშისტია. როგორ აიღო ტოლერანტობის ჯილდო ნაირა გელაშვილმა , ეს ჩემთვისაა გასაკვირი, ეს არ ვიცოდი, მაგრამ არაფრის დაბრუნებას არ ვაპირებ. ჩვენ ვამაყობთ იმით, რაც ავიღეთ და ნაირა გელაშვილს რაც უნდა, ის გააკეთოს. მე მას პატივს არ ვცემ, როგორც საზოგადო მოღვაწეს“, -უთხრა გვარამიამ ტვ „იმედს“.

გელაშვილის განმარტებით, მას არ სურს, ამ ჯილდოთი იყოს გათანაბრებული „სისხლის სამართლის დამნაშავეებთან, ბოროტმოქმედებთან, რომლებსაც უამრავი დანაშაული აქვთ ჩადენილი“.

ანა მებურიშვილი