კომენტარი

მთავარი პროცესი წინ არის - „ომეგა ჯგუფის“ გენერალური მენეჯერი

სტოკჰოლმის სავაჭრო პალატის საერთაშორისო საარბიტრაჟო სასამართლოს გადაწყვეტილებით, საქართველოს ხელისუფლებას საქართველოს სასამართლოს ძალაში შესული გადაწყვეტილების აღსრულება აეკრძალა, რის საფუძველზეც „ომეგა ჯგუფში“ შემავალი სიგარეტის მწარმოებელი კომპანია „ოჯთ“-ის მთლიანი ქონება აუქციონზე გაიყიდებოდა.

„ომეგა ჯგუფის“ გენერალური მენეჯერის, ლევან აღდგომელაშვილის განცხადებით, სტოკჰოლმის სავაჭრო პალატის საერთაშორისო საარბიტრაჟო სასამართლოში პროცესის დასრულების შემდეგ შესაძლოა, „ომეგა ჯგუფმა“ და ტელეკომპანია „იბერიამ“ მუშაობა განაახლონ.

„მუშაობის განახლებას რაც შეეხება, ამ ეტაპისთვის კომპანიის აქტივების რეალიზება არ მოხდება. ეს აკრძალვა დააწესა საერთაშორისო სასამართლომ. სამართლებრივი პროცესი გაგრძელდება. ეს იყო შუალედური გადაწყვეტილება, მთავარი პროცესი წინ არის. მთავარი პროცესის მსვლელობის განმავლობაში შესაძლებელია, რომ მუშაობა აღდგეს. საერთაშორისო სასამართლოს დასრულების შემდეგ არის შანსი, თანამშრომლებმა მუშაობა განაახლონ. რაც შეეხება ტელეკომპანია „იბერიას“, მისი მუშაობის განახლება იგეგმება, უბრალოდ როდის მოხდება, ეს დამოკიდებულია „ომეგა ჯგუფის“ ფინანსურ მდგომარეობაზე. „ომეგა ჯგუფს“ უარი არასდროს უთქვამს კომპენსაციის გადახდაზე, თუმცა როდის მოხერხდება, ნამდვილად არ მაქვს ინფორმაცია“, – განაცხადა ლევან აღდგომელაშვილმა.

შეგახსენებთ, პირადი ანგარიშსწორების რეალური საფრთხის მიუხედავად, „ომეგა ჯგუფის“ დამფუძნებელმა, ბიზნესმენმა ზაზა ოქუაშვილმა კორუფციასა და გამოძალვაში ამხილა საქართველოს როგორც მოქმედი, ასევე ყოფილი მაღალჩინოსნები. სრული კრახით დასრულდა მმართველი პარტიის მხრიდან ზაზა ოქუაშვილის დეკლარირებული მხარდაჭერის იძულების მცდელობა.

ოქუაშვილის ხმამაღალ განცხადებებს სადამსჯელო ღონისძიებები მოყვა. მას დავალიანება შეახსენეს და აქციზების მიწოდებაზე უარი უთხრეს. ამ დრომდე „ომეგა ჯგუფის“ სიგარეტის ფაბრიკა გაჩერებულია.