მსოფლიო

მსოფლიოში 264 მილიონ ბავშვს საშუალო განათლება მიღებული არ აქვს - UNICEF

გაერო-ს ბავშვთა ფონდის, UNICEF-ის ინფორმაციით, საბრძოლო მოქმედებისა და მიმდინარე კონფლიქტების გამო, მსოფლიოში 264 მილიონ ბავშვს საშუალო განათლება მიღებული არ აქვს.

როგორც ორგანიზაციის უახლეს ანგარიშშია ნათქვამი, მსოფლიოს 24 განვითარებად ქვეყანაში, სადაც საომარი მოქმედებები მიმდინარეობს და გახშირებულია სკოლებზე თავდასხმები, ექვსიდან 14-წლამდე 27 მილიონ ბავშვს საშუალება არ აქვს, სკოლაში ისწავლოს.

დოკუმენტში მაგალითად მოყვანილია ნიგერია, სადაც რადიკალური ისლამისტური ტერორისტული ორგანიზაცია „ბოკო ჰარამი“ სკოლებზე თავდასხმებს ახორციელებს.

უკანასკნელ წლებში დაჯგუფებამ ნიგერიაში 1000-ზე მეტი სკოლა გაანადგურა და 2300-მდე მასწავლებელი მოკლა. 2014 წელს ამავე ორგანიზაციამ სკოლიდან 250 მოსწავლე გაიტაცა.

ანგარიშში ასევე ნახსენებია პაკისტანში მომხდარი ფაქტებიც – ტერორისტულ გაერთიანება თალიბანს თავდასხმის სამიზნედ სკოლები არაერთხელ შეურჩევია.

გაერო-ს ბავშვთა ფონდმა საერთაშორისო ორგანიზაციებს განვითარებად ქვეყნებში, სადაც ზემოთ ხსენებული პრობლემები არსებობს, განათლების მიმართულებით ბიუჯეტის გაზრდისკენ მოუწოდა.

როგორც UNICEF-ის წარმომადგენელი იურგენ გერაუსი ამბობს, დღეს დონორი ორგანიზაციები ამ ქვეყნებში ბიუჯეტის 3,6%-ს განათლების მიმართულებით ხარჯავენ. მისი თქმით, აღნიშნული თანხა არასკმარისია და ამ სფეროსთვის ყოველწლიურად 340 მილიარდი დოლარია საჭირო.