კომენტარი

მშვიდობის დაცვა არ არის ხელისუფლების ექსკლუზიური უფლება- ირაკლი სესიაშვილი

მშვიდობის დაცვა არ არის ხელისუფლების ექსკლუზიური უფლება, არამედ უსაფრთხოებაზე როდესაც ვსაუბრობთ, თუ საზოგადოება არ იქნება ამის თანამონაწილე, ძალიან რთული იქნება შედეგზე გასვლა, - განაცხადა პარლამენტის თავდაცვისა და უშიშროების კიტეტის თავმჯდომარემ ირაკლი სესიაშვილმა ”პალიტრანიუსის” გადაცემაში ”360 გრადუსი” სტუმრობისას, პანკისის ხეობასა და ტერორიზმის საფრთხეებზე საუბრისას.

თემაზე საუბრისას საპარლამენტო უმრავლესობის წევრმა, დანაშაულის დაფარვის პრობლემაზე გააკეტა აქცენტი.

“მე მინდა პატარა მინიშნება გავაკეთო - ბერი გაბრიელ სალოსის ქუჩაზე ჩატარდა სპეცოპერაცია, რომელიც იყო ნომერ პირველი თემა არა მარტო საქართველოში. ყველამ დაინახა, რომ მოხდა ტერორისტების ლიკვიდაცია, სამწუხაროდ, დაიღუპა ჩვენი სპეცრაზმელი და ამ მოვლენის დასრულების შემდეგ, სამწუხაროდ, ჩვენს ქვეყანაში აღმოჩნდნენ თანამოქალაქეები, რომლებიც ამ ტერორისტებს ეხმარებოდნენ. ეს ადამიანები ამ ყველაფერს უყურებდნენ. ნახეს, რომ მოხდა იმ ადამიანების ლიკვიდაცია, რომლებიც ტერორიზმთან კავშირში იმყოფებოდნენ, თუმცა, ეს ადამიანები პოლიციაში არ გამოცხადდნენ. რიგ შემთხვევაში ხდება საკითხზე თვალის დახუჭვა. ის, რომ ამ ადამიანებს ჰქონდათ კავშირი ტერორისტულ დაჯგუფებებთან, რადიკალურ ჯგუფებთან, „ისლამურ სახელმწიფოსთან“, ეს ყველაფერი ადგილზე ძალიან ბევრმა კარგად იცოდა”, - განაცხადა ირაკლი სესიაშვილმა.

მისივე თქმით, ტერორიზმთან ეთნიკური თუ რელიგიური ჯგუფების დაკავშირება დაუშვებელია.